SQO-da 40 kásiporyn zeınetaqy aýdarymdary boıynsha 254 mln teńge qaryz

PETROPAVL. QazAqparat – Soltústik Qazaqstan oblysynda prokýratýra 8,5 myń adamnyń quqyǵyn qorǵap, nátıjesinde eńbekaqy boıynsha qordalanǵan qaryz - 700 mln teńge tólendi, dep habarlaıdy QazAqparat tilshisi.

SQO prokýratýrasynyń málimetinshe, 2014 jyldan beri bankrot dep tanylǵan 9 kásiporynnyń 116 jumysshysyna eńbekaqy boıynsha borysh óteldi. Eńbek ınspektsııasynyń tekseristerinen keıin 44 kásiporyn qyzmetkerlerine 24 mln teńge tıisti ótemaqy jasaldy. Myńnan astam jumysshynyń eńbek jaǵdaıy jaqsartyldy.

Al júıeli túrde jumysshylaryna eńbekaqy boıynsha qaryz bolyp kelgen úsh jumys berýshi byltyr qylmystyq jaýapkershilikke tartyldy. Olarǵa 200 AEK mólsherinde aıyppul salyndy. Qazir Aıyrtaý, Tımırıazev aýdandaryndaǵy jáne Petropavl qalasyndaǵy jumys berýshilerdiń isi sotqa deıin tergelip jatyr.

«Mindetti áleýmettik jáne zeınetaqylyq tólemderdi jasamaý derekteri tirkeldi. Bıylǵy aqpan aıyna deıingi málimet boıynsha 40 shaqty kásipker 254 mln teńge zeınetaqy aýdarymdaryn jasamaǵan. Olardyń 75% - aýyl sharýashylyǵyna tıesili. Olardyń tólem jasaýǵa múmkindikteri bolǵanymen, boryshtan qutylýǵa asyqpaǵan», - SQO prokýrorynyń kómekshisi Jarqyn Belgibekov.

Mamandardyń aıtýynsha, sońǵy úsh jylda jumys oryndarynda jaraqat alýdyń 167 deregi tirkelgen. Al tekserý barysynda byltyr osyndaı 5 jaǵdaıdy jasyrý faktisi anyqtaldy.

Jalpy byltyr qadaǵalaýshy organnyń aralasýynan keıin 8,5 myń adamnyń 700 mln teńgege quqyǵy qorǵaldy.