SQO-da 40-qa jýyq turǵyn alaıaqtardyń qurbany boldy
ASTANA. KAZINFORM — Soltústik Qazaqstan oblysynda ınternet-alaıaqtar medıtsınalyq mekeme qyzmetkerleriniń atyn jamylyp, turǵyndardy aldaýdyń jańa tásilin qoldanǵan. Qazirgi ýaqytta osyndaı aıla-sharǵynyń saldarynan óńirdiń 40-qa jýyq turǵyny zardap shekti.
Polisia.kz málimetinshe, alaıaqtar azamattarǵa telefon shalyp, skrınıngten nemese flıýorografııadan ótý, medıtsınalyq taldaýlar tapsyrý qajettigin aıtady. Osylaısha, medıtsınalyq qyzmetke qatysty aqparatty jeleý etip, turǵyndardyń senimine kiredi. Mundaı jaǵdaıda kez kelgen medıtsınalyq protsedýrany syltaý etýi múmkin.
Áńgime barysynda qaskóıler azamattarǵa «elektrondy kezekke» tirkeýdi usynyp, SMS arqyly kelgen rastaý kodyn aıtýdy suraıdy. Kodty ıemdengennen keıin bank, eGov nemese quqyq qorǵaý organdarynyń qyzmetkerleri retinde qaıta habarlasady.
Olar azamattyń SMS-kodty bógde adamǵa aıtyp qoıǵanyn, sonyń saldarynan onyń atyna nesıe rásimdelip jatqanyn jetkizedi. Keıin máseleni sheshýdiń joly retinde «qatesiz nesıe» rásimdeýdi usynyp, aqshany «qaýipsiz shotqa» aýdarýǵa kóndiredi. Alaıda munyń bári — azamattardyń aqshasyn ıemdenýge baǵyttalǵan alaıaqtyq áreket.
— Qylmyskerlerdiń azamattardyń jeke málimetterine qol jetkizýi múmkin ekenin eskerý qajet. Oblysta alaıaqtardyń derekqorlardy buzyp, adamdardyń senimine kirgen jaǵdaılary tirkeldi. Máselen, olar azamattardyń qandaı taldaýlar tapsyrǵanyn nemese dáriger qabyldaýyna qaı ýaqytqa jazylǵanyn bilgen. Este saqtańyz, medıtsınalyq qabyldaýǵa jazylýdy rastaý úshin eshkimge SMS-kodty aıtý qajet emes. Eger sizge medıtsınalyq mekeme atynan qońyraý shalynsa, áńgimeni toqtatyp, aqparatty tekserý úshin ýchaskelik medbıkege nemese tirkeý bólimine ózińizge belgili resmı nómir arqyly habarlasyńyz, — dep eskertti SQO PD bastyǵynyń birinshi orynbasary Álibek Qujahmetov.
Polıtsııa málimetinshe, jyl basynan beri Soltústik Qazaqstan oblysynda ınternet-alaıaqtyqtyń 443 faktisi tirkelgen. Bul ótken jyldyń sáıkes kezeńimen salystyrǵanda shamamen 30 paıyzǵa az.
Polıtsııa turǵyndardy saq bolýǵa, beıtanys adamdarǵa SMS-kodtardy, bank derektemelerin jáne jeke málimetterin bermeýge shaqyrady. Sondaı-aq telefon arqyly aıtylǵan kúmándi nusqaýlardy oryndamaı, kez kelgen aqparatty resmı baılanys arnalary arqyly tekserý qajet.
Aıta keteıik, Oralda jábirlenýshilerge 158 mln teńge zalal keltirgen alaıaq áıel sottaldy.
