SQO-da -40 gradýsqa deıin aıaz bolady
PETROPAVL. QazAqparat – Soltústik Qazaqstan oblysynda kelesi aptada kún kúrt sýytyp, synap baǵanasy - 40 gradýsqa deıin tómendemek.
Osyǵan oraı qutqarýshylar aldyn ala sms-habarlamalar jiberip, oqys oqıǵalardyń aldyn alý úshin birqatar sharany qolǵa aldy, dep habarlaıdy QazAqparat tilshisi.
SQO tótenshe jaǵdaılar departamenti bastyǵynyń orynbasary Murat Qanǵojınovtyń aıtýynsha, kelesi aptada taǵy da kún buzylyp, bul joly kún kúrt sýytpaq. Kúndiz synap baǵanasy -30-35 gradýsqa deıin, túnde keı jerlerde - 40 gradýsqa tómendemek.
«Qazir bilim basqarmasymen birge jumys istep jatyrmyz, mundaı aıaz bolǵan jaǵdaıda mektepterde sabaq bolmaıdy. Sondaı-aq aýdandardyń ákimdikterimen, polıtsııamen de baılanys ornattyq. Avtojoldarda qozǵalysty shekteýdi usyndyq. Oblys aýmaǵynan soltústik antıtsıklony ótpek, sáıkesinshe bir apta boıy aıaz turady.
Avtobýstar, júk kólikteri arzan baǵasyna qyzyǵyp keıde jazǵy dızel otynyn qoldanady. Al ol qatty sýyqqa shydas bermeı qatyp, saldarynan kólik jolda qalady. Bul – óte qaýipti. Ózbekstan azamattary mingen avtobýstar da oblys aýmaǵynan ótedi. Tájirıbe kórsetkendeı, ádette olar jazǵy dóńgelekpen jáne jazǵy dızel otynymen júredi. Sondyqtan bul kólik júrgizýshileri de nazardan tys qalmaıdy», - deıdi Murat Qanǵojınov.
Bıyl respýblıkalyq, oblystyq mańyzy bar jol boıynda 300 jylytý beketi quryldy. Qazir olardyń daıyndyǵy pysyqtalyp jatyr. Bul beketterde jylytý quraldary, ystyq tamaq bolýy kerek.
«Qatty aıazdyń kelýine baılanysty oblys turǵyndary men qonaqtaryn qaýipsizdik sharalaryn ustanýǵa shaqyramyz. Múmkindiginshe alys jolǵa shyqpaý, shyqqan jaǵdaıda ózderińizben birge bala men qart adamdardy almaǵan jón, týǵan-týysqa qaıda jol júrgenińizdi aıtyp ketý kerek.
Bıyldan bastap joldarǵa shekteý engizilgenine qaramastan jolǵa shyqqandarǵa jaýapkershilik bar. Birinshi joly 30 AEK – 103 myń teńge aıyppul salynsa, qaıtalanǵan jaǵdaıda 15 táýlikke deıin qamaýǵa alynady. Qazir bul máseleni jergilikti polıtsııa qyzmeti qarastyryp jatyr», - deıdi vedomstvo bastyǵynyń orynbasary.
Qys bastalǵaly SQO-da 36 ret aýa raıyna baılanysty eskertý jarııalandy. 6 ret kólik jolda qaldy. 44 adam, sonyń ishinde bir bala qar qursaýynan shyǵaryldy. Ǵabıt Músirepov aýdanynda Túrkııa azamaty jylytý beketine ornalastyryldy. Taıynsha aýdany Kellerovka eldi mekeninde Reseı azamattary mingen avtobýs aýa raıyna baılanysty toqtap, kún ashylǵannan keıin ǵana jolyn jalǵady.
Al jyl bastalǵaly SQO-nyń ońtústiginde – Aıyrtaý men Aqjar aýdandarynda boranǵa baılanysty joldardy jabýǵa týra keldi.
