SQO-da 40 ga alqaptyń órtenýine sóndirilmegen temeki tuqyly sebep bolýy múmkin

PETROPAVL. QazAqparat – Soltústik Qazaqstan oblysynda ótken demalys kúnderi 32 ret dala shóbi janyp, 7 órt shyqty. Mamandar muny qurǵaq aýa raıy jáne qatty jelmen baılanystyryp otyr, dep habarlaıdy QazAqparat tilshisi.

SQO tótenshe jaǵdaılar departamentiniń málimetinshe, 7 qarasha kúni Qyzyljar aýdanyndaǵy Zaton eldi mekeni mańynda qýraǵan shóp pen qamys órtendi. Jalyn 40 gektar aýmaqty sharpydy. Oqıǵa ornyna 6 tehnıka men jeke quramnan 32 adam jumyldyryldy. Boljam boıynsha, órttiń shyǵýyna sóndirilmegen sirińke nemese temeki tuqyly sebep bolýy múmkin.

«Oblys aýmaǵynda bıyl 624 órt tirkeldi. Byltyrǵyǵa qaraǵanda 8 %-ǵa artyq. 42 adam, sonyń ishinde 2 bala mert boldy. 15 adam kúıik aldy. 35 adam qutqarylyp, 852 turǵyn evakýatsııalandy. Petropavlda da, aýdandarda da órt sany artqan. Oblys ortalyǵynda 168 órt tirkeldi, bul ótken jyldyń sáıkes kezeńimen salystyrǵanda 12,7 %-ǵa kóp. Órttiń 73 %-y jeke turǵyn úı sektorynyń úlesinde. Osylaısha 455 órt tirkelgen», - deıdi SQO TJD «Órt sóndirý jáne avarııalyq-qutqarý jumystary» MM bastyǵy Nurlan Nuqyshev.

Bıylǵy ystyq jaz, ári qýańshylyq ta órttiń kóbeıýine áser etken. Osy ýaqytqa deıin 1 677 ret ot shyqqan. Biraq ol órt retinde esepke alynbaǵan. Bul ótken jylmen salystyrǵanda 30 %-ǵa artyq.