SQO-da 4 jyldan soń kóktemde ań aýlaýǵa ruqsat berildi

PETROPAVL. QazAqparat – Soltústik Qazaqstan oblysynda araǵa 4 jyl salyp, bıyl kóktemgi ań aýlaýǵa ruqsat berilmek, dep habarlaıdy QazAqparat tilshisi.

SQO tabıǵı resýrstar jáne tabıǵatty paıdalanýdy retteý basqarmasynyń málimetinshe, 2017 jyldan bastap kóktemgi ań aýlaýǵa tyıym salynǵan edi. Bıyl qurlardyń qorazy men Qyzyl kitapqa enbegen jabaıy úırekterdiń kejekterin atýǵa ruqsat berilmek. Ań aýlaý 24 sáýir tańsáriden bastalyp, 8 mamyrǵa deıin jalǵasady.

«Ań aýlaý kezinde el aýmaǵynda qoldanylatyn ań aýlaý tártibin ustaný qajet. ıAǵnı áýesqoı ne sporttyq ań aýlaý úshin ańshyda: ańshy qujaty, orman sharýashylyǵy sýbektisiniń joldamasy, ańshy myltyǵyn qoldanǵan jaǵdaıda jeke tulǵaǵa ony paıdalanyp, saqtaýǵa jáne alyp júrýge ruqsat, al jyrtqysh ańdardy qoldanǵan jaǵdaıda olardyń qujaty bolýy kerek», - deıdi tabıǵı resýrstar jáne tabıǵat paıdalanýdy retteý basqarmasynyń bas mamany Mıhaıl Nıkıtın.

Mamannyń aıtýynsha, úırek kejekterin, qur qorazdaryn atý kezinde tıisti ańshylyq sharýashylyǵy sýbektisi qoryqshysy bolýy tıis. Sondaı-aq ań aýlaý barysynda keıbir erejelerdi de este ustaǵan jón.

«Eldi mekenderge qarasty jerlerde, sondaı-aq olarǵa irgeles aýmaqtarda ań aýlaý barysynda qaýpsizdikti qamtamasyz etý úshin ańshylyq atys qarýyn qoldanýǵa tyıym salynady. Ýákiletti organnyń ruqsatynsyz ónerkásip, kólik, baılanys, qorǵanys jerlerinde, joldamada kórsetilgen janýarlar sanynan artyq jáne joldamada kórsetilmegen janýarlardyń basqa da túrlerin tulypsyz atýǵa , sondaı-aq demalý aımaqtarynda jáne kóbeıý ýchaskelerinde atýǵa bolmaıdy», - deıdi Mıhaıl Nıkıtın.