SQO-da 4 jańa eko-park ashylady
PETROPAVL. KAZINFORM - Soltústik Qazaqstan oblysynda jalpy aýmaǵy 97,4 gektardy alatyn tórt jańa eko-park paıdalanýǵa beriledi.
SQO tabıǵı resýrstar jáne tabıǵat paıdalanýdy retteý basqarmasynyń málimetinshe, jańa eko-parkterdi qurýdaǵy maqsat - turǵyndar úshin qoljetimdi, zamanaýı ári jaıly demalys oryndaryn kóbeıtý.
Oblys ortalyǵy Petropavl qalasynyń aınalasynda úsh eko-park ashý josparlanǵan. Olardyń jalpy aýmaǵy 95,1 gektar bolmaq.
Sonyń biri – Pestroe kóliniń mańynda salynyp jatqan Trıatlon parki. Onyń aýmaǵy 41 gektar shamasynda. Bul park barlyq jastaǵy turǵyndarǵa qolaıly ınklıýzıvti demalys aımaǵy retinde jobalanǵan. Nátıjesinde jaǵajaı aımaǵy jańǵyrtylady, sýǵa qaýipsiz túsýge arnalǵan pırs salynady. Jaıaý júrginshiler joldary men jaǵalaý alleıalary jasalady, velo jáne júgirý jolaqtary paıda bolyp, sport alańdary qurylady. Sondaı-aq qoǵamdyq is-sharalar ótetin oryndar da qarastyrylady.
Taǵy bir ereksheligi - balalar úshin ekologııalyq qaýipsiz, tabıǵı materıaldardan jasalǵan oıyn alańdary ornatylady. Sonymen qatar, jasyl jelek jergilikti klımatqa beıimdelip otyrǵyzylyp, burynnan bar aǵashtar saqtalady. Qazir nysanda jumys qyzǵan. Trıatlon park bıyl paıdalanýǵa berilmekshi.
Taǵy bir mańyzdy joba — «GREEN PARK» otbasylyq demalys parki. Onyń aýmaǵy 39,6 gektardy almaq. Bul park jyl boıy jumys isteıtin kópfýnktsıonaldy demalys ornyna aınalmaq. Munda: qonaq úıler men kottedjder; basseın jáne akvapark; balalar oıyn alańdary; besedkalar men demalys aımaqtary; monsha keshenderi men meıramhana jáne shaǵyn zoobaq ornalastyrý josparlanǵan. Joba 2027 jyly iske qosylady.
Qala mańynda ornalasqan eko-parkterdiń úshinshisi - «Volna» demalys bazasy. Ol Petropavldan 12 shaqyrym jerde, Voronıı aralynda ornalasqan. Aýmaǵy -14,5 gektar.
Burynǵy balalar lagerinde joba aıasynda ǵımarattar jańǵyrtylady. Jańa SPA keshenderi men sanatorıı salynbaq. Ártúrli tıptegi qonaq úıler paıda bolady; sport jáne oıyn aımaqtary qurylady; meıramhana men demalys oryndary damytylady. Bul joba da tolyq qýatynda kelesi jyly iske qosylmaqshy.
Tórtinshi eko-park Aıyrtaý aýdanyndaǵy Imantaý-Shalqar kýrorttyq aımaǵynda, «Glempıng №1» bazasy negizinde salynbaq.
Munda A-frame stılindegi demalys úıleri, bóshke monshalar, dámhanalar, besedkalar, pırs jáne qaıyq stantsııasy salynady. Qonaqtar ásem tabıǵat aıasynda qalanyń shýynan demalýǵa múmkindik alady. Joba bıyl iske qosylmaq.
Buǵan deıin SQO-nyń kıeli oryndary topografııalyq kartaǵa toptastyrylǵanyn jazǵan edik.
