SQO-da 4 myńǵa jýyq kásipker saýalnamadan ótti
PETROPAVL. QazAqparat - Qańtar aıynda bastalǵan kásipkerlerdiń alǵashqy respýblıkalyq saýalnamasy mamyr aıyna deıin jalǵasady. SQO-da ázirshe bıznes ókilderiniń shamamen 30% ǵana saýalnamadan ótti, dep habarlaıdy QazAqparat tilshisi.
Bıznesmender kásipkerler palatasy qyzmetkerleriniń suraqtaryna jaýap berip nemese «Atameken Services» qosymshasy arqyly ózdiginen saýalnamadan óte alady. Mamandardyń aıtýynsha, kásip ıelerine úsh suraq qoıylady, olar: derekterdi ózekti qylý, shyǵarylatyn ónim jaıynda aqparat berý jáne ózekti máselemen bólisý.
SQO-da qazir 29 myńǵa jýyq kásipker bar. Búginge deıin olardyń 6,5 myńy saýalnamadan ótti. 4 myńǵa jýyq bıznes ókili «Atameken» kásipkerler palatasynyń ıntervıýerlerine óz máselelerin jetkizgen.
«Maqsatymyz - kásipkerlermen baılanys ornatyp, olardyń problemalaryn bilý, joǵary deńgeıde sheshýge kómektesý. Oblys boıynsha 6,5 myń bıznes ókili saýalnamadan ótti. Kásipkerlerdiń kópshiligi nesıe alýda qıyndyqtarǵa tap bolady eken, óıtkeni olardyń bank suraǵan kepilge qoıatyn dúnıesi joq. Osyndaı 200-den astam nesıe alýǵa baılanysty problema anyqtaldy. Qazir bul máselelerdi sheshý joldaryn qarastyryp jatyrmyz. Saýalnama aıaqtalysymen iske kirisemiz», - deıdi oblystyq kásipkerler palatasy qarjylaı emes qoldaý bóliminiń bastyǵy Aleksandr Berdnıchenko.
«Atameken» kásipkerler palatasynyń qurylǵanyna bıyl 5 jyl tolady. Osy aralyqta mamandar oblystyń kásipkerlerinen 25 myńnan astam ótinish qabyldap, máselelerin sheshýge kómektesti. Elimizde kásipkerler arasynda alǵash uıymdastyrylyp otyrǵan saýalnama bıznesti damytýdaǵy kedergilerdi anyqtaýǵa múmkindik bermek.
SQO-da saýalnamadan, ázirshe kásipkerlerdiń shamamen 30% ǵana ótti. Qalǵandaryn belgilengen ýaqyt - mamyrdyń birine deıin qamtý úshin kásipkerler palatasynyń 30 sarapshysy kúnine 20 saýalnamany toltyrýy tıis.
