SQO-da 4 myń túrli ıis saqtalǵan odorologııa bazasy bar
PETROPAVL. QazAqparat – Soltústik Qazaqstan oblysynyń polıtseıleri on jyldan artyq tórt myń túrli ıisti jınap, odorologııalyq baza qurdy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, odorologııalyq baza jedel-krımınalıstik basqarmada qurylǵan.
«Odorologııa – ıis týraly ǵylym. Ol birneshe baǵytqa bólingen: medıtsınalyq, psıhologııalyq jáne krımınalıstıkalyq. Tártip saqshylary negizinen osy úshinshi baǵytymen jumys isteıdi. Polıtseıler bul bazany 2009 jyly qurdy. Qazir munda 4025 túrli ıis saqtalǵan. 197 zertteý júrgizilip, barlyǵynda oń nátıje alyndy. Qazir mundaı zertteýler júrgizilmeıdi. Óıtkeni ıisshil ıtter qartaıyp, olardyń ornyna basqalaryn aldyq», - deıdi SQO PD jedel-krımınalıstik basqarmanyń basshysy Igor Semenov.
Qazir odorologııalyq baza janynan qurylǵan zerthanada eki ıt úıretilip jatyr. Olar eki jasar orys spanıeli Deızı men Alfa atty úsh jastaǵy nemis ovcharkasy.
Itter krımınalıst Talǵat Músipov pen ınspektor-kınolog Nıkolaı Jeleznovtyń qamqorlyǵynda. Byltyr olar Almatydaǵy Іshki ister mınıstrliginiń kınologııalyq ortalyǵynda bilimderin shyńdap keldi.
Iisshil ıtter daıyn bolǵannan keıin olardy qylmys ornynda bıodetektor retinde qoldanatyn bolady.
Mamandardyń aıtýynsha, jyl basynan qylmystardy ashýǵa ıisshil ıtter shamamen 500 ret qoldanylǵan. Onyń 163-i esirtki qylmysyna qatysty. Nátıjesinde 323 keli túrli esirtki zattary tárkilendi.
Sondaı-aq polıtseıler ıtterdi qoldaný arqyly 18 tonaýdy jáne 354 urlyqty ashty.
