SQO-da 4 mln teńgeniń gerbıtsıdi urlanǵan
PETROPAVL. QazAqparat – Soltústik Qazaqstan oblysynda urylar sharýashylyqtardyń birinen 4 mln teńgeniń gerbıtsıdin urlap ketti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Jambyl aýdanyndaǵy jaýapkershiligi shekteýli seriktestikterdiń birinen 1200 lıtr gerbıtsıd pen astyq oraıtyn 5 polıetılen orama joǵaldy. Shyǵyn mólsheri 4 mln teńgeden asty. Belgisiz bireýler gerbıtsıd saqtalǵan qoımaǵa qabyrǵasyndaǵy qańyltyrdy maıystyryp engen.
SQO-da qazir oraq naýqanynda astyqtyń, janar-jaǵarmaıdyń, gerbıtsıd pen aýyl sharýashylyq tehnıkasy qosalqy bólshekteriniń urlyǵyna jol bermeýge jáne ashýǵa baǵyttalǵan «Astyq» respýblıkalyq jedel-profılaktıkalyq is-sharasy ótip jatyr. Osy is-shara barysynda kúdiktiler anyqtaldy. Olar: 2001 jáne 1997 jyldary týǵan JShS-tiń eki jumysshysy men olardyń 22 jastaǵy tanysy bolyp shyqty. Atalǵan derek «Urlyq» baby boıynsha Sotqa deıingi tergep-tekserýdiń biryńǵaı tizilimine engizildi.
Polıtseılerdiń aıtýynsha, urlyq kóktemnen bastalǵan jáne birneshe ret jasalǵan. Kúdiktilerge qatysty kelý týraly mindetteme túrindegi bultartpaý sharasy qabyldandy. Urlanǵan zattardyń bir bóligi qaıtaryldy. Tergeý amaldary júrgizilýde.
«SQO-da aýyl sharýashylyǵy ónimderin óndirýshilerdiń menshigi men astyǵyn qorǵaýǵa basa nazar aýdarylady. Polıtsııanyń jeke quramy egin egý jáne oraq naýqany kezderinde dıqanshylarǵa jan jaqty kómek kórsetýi tıis. Krımınaldyq polıtsııa bólinisteriniń qyzmetkerleri oblys aýdandarynda sharýashylyqtardaǵy qaýipsizdik qyzmetterimen tyǵyz jumys isteýde. Birlesip áreket etýdiń algorıtmi de oń jolǵa qoıylǵan. Buryn jasalǵan qylmystardy da nazarda ustaımyz. Tájirıbe kórsetkendeı, urlyqtyń barlyǵy ýaqyt óte kele ashylady», - deıdi Polıtsııa departamentiniń bastyǵy Marat Tólebaev.
«Astyq» jedel-profılaktıkalyq is-shara bastalǵaly oblysta dıqanshylardyń múlkine qol suǵýmen baılanysty 5 qylmys tirkeldi. Jalpy shyǵyn kólemi 4,5 mıllıon teńgeni qurady. Barlyq qylmystar ashyldy.
