SQO-da 4 kúnniń ishinde 12 atys qarýyn tárkilendi
PETROPAVL. QazAqparat - SQO polıtseıleri 4 kúnniń ishinde 12 atys qarýyn tárkiledi, dep habarlaıdy QazAqparat Polisia.kz saıtyna silteme jasap.
«Temir jınaǵan kezde taýyp aldym», «Jóndeý jumystaryn júrgizgen kezde taptym» – osyndaı túsiniktemelerdi soltústikqazaqstandyqtar ádette tirkelmegen qarýdy tárkilegende aıtyp jatady.
Tamyzdyń 25-nen 28-ine deıin oblys aýmaǵynda «Qarý» jedel-profılaktıkalyq is-sharasy ótti. Maqsaty – krımınogendik jaǵdaıdy saýyqtandyrý, qarýdy qoldana otyra jasalatyn qylmys qaýpin tómendetý. Іs-shara kezinde 45 patron jáne zańsyz saqtalyp kelgen 12 atys qarýy, onyń ishinde 7 tegis uńǵyly, 2 travmatıkalyq, 1 oıyqty jáne gazdy qarý, 1 revolver tárkilendi. Olar saraptamaǵa jiberildi, zańsyz ıeleri jaýapqa tartyldy.
«Qarý zańmen belgilengen qatań tártipke saı saqtalýy tıis. Tirkelmegen qarý qaýipti: ol jazataıym oqıǵaǵa sebepshi bolýy, qoldy bolyp, qylmysta qoldanylýy múmkin. Qarýdy jáne oq-dárilerdi zańsyz saqtaǵany úshin ákimshilik jáne qylmystyq jaýapkershilik kózdelgen. Jaýapkershilikten qarýdy polıtsııaǵa óz erkimen tapsyrý ǵana bosatady», – dep eske saldy SQO Polıtsııa departamenti Krımınaldyq polıtsııa basqarmasy bastyǵynyń mindetin atqarýshy Madııar Harıpov.
Aıta ketetini, jedel-profılaktıkalyq is-shara kezinde óz erkimen 4 tegis uńǵyly myltyq tapsyryldy. Máselen, Jambyl aýdanynyń turǵyny qaıtys bolǵan ákesine tıesili TOZ-BM myltyǵyn ákep tapsyrǵan. Polıtseıler oblys turǵyndaryn qaýipten saqtanyp, qarýdy tapsyrýǵa shaqyrady. Qarýdy zańsyz saqtaý faktilerin anyqtaý jumysy turaqty negizde jalǵasatyn bolady.
Foto: polisia.kz
