SQO-da 4 kún ishinde 18 mas júrgizýshi anyqtaldy
PETROPAVL. QazAqparat – Soltústik Qazaqstan oblysynda «Qaýipsiz jol» jedel-aldyn alý is-sharasy ótip jatyr. Operatsııanyń 4 kúninde 18 mas júrgizýshi ustaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, patrýldik polıtseıler 9 sáýirge qaraǵan túni shamamen saǵat 3.30-da Abaı men Jumabaev kósheleriniń qıylysynda «Lexus 570» avtokóliginiń júrgizýshisin toqtatqan. Tizginde Petropavldyń 32 jastaǵy turǵyny bolǵan. Júrgizýshiden alkogoldiń ıisi shyqpaǵanymen, onyń áreketteri tártip saqshylarynyń kúdigin týdyrǵan. Er adamǵa medıtsınalyq kýálandyrýdan ótý usynyldy, alaıda, ol úzildi-kesildi bas tartqan.
Atalǵan fakti boıynsha QR Ákimshilik quqyq buzýshylyq týraly kodeksiniń 613-baby 4-bóligi boıynsha materıal jınastyryldy. Baptyń atalǵan bóligimen alkogoldik, esirtkilik jáne (nemese) ýytqumarlyq masań kúıin kýálandyrýdan ótý týraly polıtsııa qyzmetkeriniń zańdy talabyn oryndamaǵany úshin jaýapkershilik kózdelgen. Sot úkimimen qala turǵynyna 15 táýlikke qamaýǵa alý jáne 8 jylǵa kólik basqarý quqyǵynan aıyrý túrindegi jaza taǵaıyndaldy.
«Eger kýálandyrý masańdyq dárejesin kórsetken jaǵdaıda, júrgizýshi 7 jylǵa kólik júrgizý quqyǵynan aıyrylar edi. Júrgizýshilerden zańnamany buzbaýdy jáne bılik ókilderiniń zańdy talaptaryn oryndaýdy suraımyz. Barlyǵy 4 kúnniń ishinde oblys joldarynda 18 mas júrgizýshi anyqtaldy. Bul SQO-da bastaý alǵan «Qaýipsiz jol» jedel-profılaktıkalyq is-sharasynyń alǵashqy kúnderiniń nátıjesi», - deıdi SQO PD jergilikti polıtsııa qyzmeti basqarmasy bastyǵynyń orynbasary Aleksandr Rozbah.
«Qaýipsiz jol» is-sharasy bastalǵaly óńirde jolda júrý qaǵıdalarynyń 2219 túrli buzýshylyǵy anyqtaldy, onyń ishinde 39 fakti – baǵdarshamnyń tyıym salatyn belgisine ótý, jaıaý júrginshilerdi ótkizbeýdiń 51 jaǵdaıy, 158 jyldamdyq rejımin buzý jáne 61 manevrleý qaǵıdalaryn buzý.
