SQO-da 4 kún buryn joǵalǵan er adamnyń uıaly telefony tabyldy
PETROPAVL. QazAqparat – Soltústik Qazaqstan oblysynda túnde kórshi aýyldan úıine jaıaý shyqqan er adamnyń uıaly telefony tabyldy, dep habarlaıdy QazAqparat tilshisi.
SQO tótenshe jaǵdaılar departamenti bastyǵynyń orynbasary Murat Qanǵojınovtyń aıtýynsha, Esil aýdany Aleksandrovka aýylynyń turǵyny, 33 jastaǵy jigit 5-nen 6-shy naýryzǵa qaraǵan túni joǵalǵan.
Er adam ıAvlenka aýylynda ózi jumys isteıtin uıym uıymdastyrǵan merekelik korporatıvte bolǵan. Túngi saǵat 3.00 shamasynda Pokrovka eldi mekenindegi dosyna kelgen. Jarty saǵattan keıin Aleksandrovka aýylyna úıine barmaq bolyp jolǵa shyqqan. Sol túni boran bolǵan, al eki eldi mekenniń ara qashyqtyǵy 25 shaqyrym. Saǵat 4.48 mınýt ketkende onyń Pokrovka aýylyndaǵy mekteptiń janynan ótip bara jatqany beınekameralardyń birine túsip qalǵan. Baǵyty Aleksandrovka bolǵan, biraq jigit keıin qaıtyp kelgen.
Týǵan-týystary 7 naýryz kúni ǵana kómek surap, qutqarýshylarǵa habarlasqan. Tek sodan keıin ǵana izdeý jumystary bastaldy.
«Jigitti izdeýge departament mamandary, polıtseıler, jergilikti atqarýshy organ ókilderi, jigit jumys isteıtin uıymnyń qyzmetkerleri jumyldyryldy. Іzdeý toby 7 naýryzdan beri jumys istep jatyr. Tek 9 naýryz kúni Pokrovkadaǵy mekteptiń janynan er adamnyń uıaly telefony tabyldy. Pokrovka, Maltsevo eldi mekenderin aralap shyqtyq, úıdi-úıge júrdik. Bos turǵan, ıesiz qalǵan nysandardyń barlyǵy tekserildi. Jaqyn mańdaǵy aýyldarǵa habar berildi. Ázirge nátıje joq», - deıdi Murat Qanǵojınov.
Іzdeý jumystary toqtaǵan joq.
Buǵan deıin 33 jastaǵy Aleksandr Kapelıýkke izdeý jarııalanǵanyn aıtqan edik. Іzdeý jumystaryna volonterler de kómektesip jatyr.
