SQO-da 4 kúdikti sibir eligin atyp, múshelep jatqan jerinen ustaldy

PETROPAVL. QazAqparat – Soltústik Qazaqstan oblysynda sibir eligin zańsyz aýlaǵan 4 kúdikti oqıǵa ornynda ustaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, zańsyz ań atty dep kúdikke ilingender turǵyndardyń qyraǵylyǵy arqasynda qolǵa tústi. Polıtsııaǵa qońyraý soqqan turǵyn Qyzyljar aýdany Jaltyr kóliniń mańynda «Kia Sorento» jol talǵamaıtyn kóligin mingender janýarlardy múshelep jatqanyn jetkizgen.

Oqıǵa ornyna aýdandyq polıtsııa bóliminiń jedel tergeý toby jetip, tórt er adamdy ustady. Olar eki sibir eligin atyp alyp, múshelep jatqan jerinen qolǵa tústi. Tekserý barysynda polıtsııa qyzmetkerleri eki pyshaq, Vepr markaly karabınder, tegis uńǵyly myltyq pen patrondardy tárkiledi.

Atalǵan fakti boıynsha QR Qylmystyq kodeksi 337-babynyń 4-bóligi «Zańsyz ańshylyq» boıynsha sotqa deıingi tergeý bastaldy. Ustalǵandar ýaqytsha ustaý ızolıatoryna qamaldy. Saraptamalar taǵaıyndaldy. Іstiń mán-jaıyn jan-jaqty zerdeleý maqsatynda tıisti tergeý áreketteri júrgizilip jatyr. Onyń nátıjesi boıynsha túpkilikti protsessýaldyq sheshim qabyldanbaq.