SQO-da 4 kolledjdiń materıaldyq bazasyn jaqsartýǵa 1,2 mlrd teńge jumsaldy
PETROPAVL. QazAqparat – Soltústik Qazaqstan oblysynda sońǵy tórt jylmen salystyrǵanda kolledjderdi qarjylandyrý bıyl 4 ese artyp, materıaldyq-tehnıkalyq bazany jaqsartýǵa 275 mln teńge jumsaldy, dep habarlaıdy QazAqparat tilshisi.
SQO ákimdiginiń otyrysynda kolledjderdiń qazirgi jaǵdaıy aıtyldy. Óńirdiń arnaıy orta bilim beretin oqý oryndarynda oń ózgerister bar. Qarjylandyrý 2017 jylmen salystyrǵanda 4 ese artyp, bıyl jaraqtandyrýǵa 275,8 mln teńge jumsaldy. Budan basqa 4 kolledjge respýblıkalyq bıýdjetten 1,2 mlrd teńge bólinip, oǵan joǵary tehnologııalyq qondyrǵy, oqý quraldary satyp alyndy.
Máselen jaqynda qurylǵanyna ǵasyr tolatyn M.Jumabaev atyndaǵy joǵary kolledjge 3D modeldeý, robototehnıka zerthanasy, mýltımedııalyq kabınetter, ınteraktıvti panelder alyndy.
Mashına jasaý kolledjiniń stýdentteri endi zamanaýı jabdyqta sheberligin shyńdaıdy.
Qurylys-ekonomıkalyq kolledjde qurylys materıaldaryna saraptama jasaýǵa múmkindik beretin zerthana quryldy.
«Bul atqarylǵan jumys kolledj túlekteriniń daıyndyǵyn jaqsartady, eńbek naryǵynda básekege qabiletti baǵdarlamalaýshy, qurylysshy, mehanık, elektrık jáne tehnolog daıarlanady. Kelesi jyly 5 kolledjdi damytý josparlanǵan. Osy maqsatqa 1,5 mlrd teńge jumsalmaq. Olar: Aıyrtaý jáne Ǵabıt Músirepov aýdandaryndaǵy agrotehnıkalyq, Esil aýdanyndaǵy joǵary aýyl sharýashylyq, Taıynsha aýdanyndaǵy agrobıznes jáne Petropavldaǵy servıs jáne kásibı daıarlaý kolledjderi. Osylaısha 2 jyldyń ishinde biz barlyq kolledjderdiń 40 % jaqsartamyz», - dedi oblys ákim Qumar Aqsaqalov.
