SQO-da 38,5 mln teńge kóleminde ınternet-alaıaqtyqqa qatysy bar bes adam ustaldy

PETROPAVL. KAZINFORM – Soltústik Qazaqstan oblysynda ınternet-alaıaqtyqqa qatysy bar bes kúdikti ustaldy, dep habarlaıdy Polisia.kz.

Maǵjan Jumabaev aýdanynyń Býlaev qalasynda polıtseıler Іshki ister mınıstrliginiń kıberqylmysqa qarsy is-qımyl departamenti men prokýratýranyń úılestirýimen 19 ben 24 jas aralyǵyndaǵy bes turǵyndy qolǵa túsirdi.

Tergeý málimetterine sáıkes, Aqqaıyń aýdanynyń 21 jastaǵy turǵyny halyqaralyq ınternet-alaıaqtyq jelisine qatysy bar uıymdasqan qylmystyq topty qurǵan degen kúdikke ilindi. Ol top músheleriniń – tórt adamnyń áreketin úılestirip otyrǵan.

Kúdiktiler qylmystyq jolmen tabylǵan qarajatty aýdarý jáne qolma-qol alý úshin bank shottary men tólem kartalaryn paıdalanatyn adamdardy uıymdastyrǵan.

Qazirgi ýaqytta ustalǵandardyń elimizdiń ár óńirinde, sonyń ishinde SQO-da jasalǵan segiz ınternet-alaıaqtyq deregine qatysy bar ekeni anyqtaldy. Bul ister boıynsha jalpy keltirilgen materıaldyq shyǵyn 38,5 mln teńgeni quraıdy.

– Olardyń basqa da osyǵan uqsas qylmystarǵa qatystylyǵy tekserilýde. «Zań jáne tártip» tujyrymdamasyn júzege asyrýdaǵy basym baǵyttardyń biri – ınternet-alaıaqtyqpen kúres. Bul baǵyttaǵy jumys jalǵasyp, oblystyq polıtsııa departamenti basshylyǵynyń erekshe baqylaýynda tur, – dedi SQO PD kıberqylmysqa qarsy is-qımyl basqarmasynyń bastyǵy Álnur Ahmedıarov.

Aıta keteıik, SQO-da jarty jylda memlekettik qyzmet zańnamasyn buzýdyń 500-ge jýyq faktisi anyqtaldy.