SQO-da 38 júrgizýshi kólik oqıǵasy ornynan qashyp ketken
PETROPAVL. QazAqparat – Soltústik Qazaqstan oblysynda jyl basynan jol-kólik oqıǵasy ornynan 38 júrgizýshi qashyp ketse, solardyń 24-in polıtseıler anyqtap, jaýapqa tartty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Petropavldaǵy Karavannaıa kóshesinde «Audi» kóliginiń júrgizýshisi jaıaý júrginshiler jolaǵynyń aldynda toqtaǵan. Artynda qatty kele jatqan «Toyota Alphard» avtokóligi soqtyǵysýdan qashqanymen, aldyndaǵy mashınany ilip áketken. Jaýapkershilikten qashyp, júrgizýshi oqıǵa ornynan ketip qaldy. Al «Audi» kóliginiń jolaýshysy medıtsınalyq kómekke júginýge májbúr bolady.
Tártip saqshylaryna apatty jasaǵan júrgizýshini anyqtaý ońaıǵa soqpady. Beınejazbada júrgizýshiniń nómirlik belgisin kórý múmkin bolmaǵan, tek kóliktiń RF tirkelgeni anyqtaldy. 12 naýryz kúni «Toyota» kóliginiń 33 jastaǵy júrgizýshisi ustaldy. Ákimshilik óndiristi qamtamasyz etý úshin onyń kóliginiń nómirlik belgileri alyndy. QR Ákimshilik quqyq buzýshylyq týraly kodeksiniń eki baby, ıaǵnı jol-kólik oqıǵasyn jasaǵany úshin jáne jol-kólik oqıǵasy ornynan ketip qalǵany úshin materıaldar jınastyryldy. Atalǵan materıal endi sotqa joldanady. Júrgizýshige aıyppuldar salynyp, ol kólik basqarý quqyǵynan 1 jylǵa deıin aıyrylýy múmkin.
«Zańnama talaptaryna sáıkes zardap shegýshini medıtsınalyq mekemege ótip bara jatqan kólikpen jetkizý múmkin bolmaǵan jaǵdaıda, kómek kórsetý úshin jol-kólik oqıǵasy bolǵan jerden ketip qalýǵa ruqsat etiledi. Basqa kólikterdiń ótýin qamtamasyz etý úshin ǵana soqtyǵysqan kólikti qozǵaýǵa bolady. Tek apatqa qatysy bar zattardyń jáne kólik quraldarynyń bastapqy ornalasqan ornyn túsirip alý qajet», - deıdi jergilikti polıtsııa qyzmeti basqarmasynyń bastyǵy Aıdyn Baımatov.
Jyl basynan SQO-da júrgizýshiler jol-kólik oqıǵasy ornynan 38 ret ketip qalǵan. Qazirgi ýaqytta 24 fakti ashyldy. Onyń segizinde adamdar zardap shekken.
