SQO-da 38 jastaǵy er adam eki aıdan beri tabylmaı jatyr
PETROPAVL. QazAqparat – Petropavl turǵyny Evgenıı Dýdıkovke izdeý jarııalandy. 38 jastaǵy er adam 8 qazannan beri tabylmaı jatyr, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, 38 jastaǵy Evgenıı Dýdıkov 8 qazan kúni Petropavldaǵy úıinen belgisiz baǵytta ketip qalǵan. Erekshe belgileri: boıy 178 sm, aryqsha kelgen, shashy qoıý sary, kózi – jasyl. Ústinde kúrteshe, kók krossovka bolǵan. Tártip saqshylary onyń júrgen jeri týraly qandaı da bir aqparat bolsa, 8-(7152)-49-39-49, 49-30-74, 8-747-559-70-71 nemese «102» nómirine habarlaýdy suraıdy.
Sondaı-aq SQO Taıynsha aýdany Letovochnoe eldi mekeniniń 47 jastaǵy turǵyny Anatolıı Frankovskıı izdestirilip jatyr. Ol 23 qarasha kúni úıinen shyǵyp ketken. Sońǵy ret er adamdy Krasnokamenka eldi mekeninde kórgender bar.
Anatolıı Frankovskııdiń boıy 165 sm, aryqsha kelgen, qysqa sary shashty, jıren saqaly bar. Sol kúni ústinde qara bylǵary kúrteshe, qara toqyma bas kıim, kók djıns shalbar bolǵan.
Jalpy SQO-da jyl basynan iz-túzsiz joǵalǵandardy izdeýge qatysty 450-ge jýyq ótinish túsken. Olardyń 436-synyń júrgen jeri anyqtaldy.
Jedel ýákilderdiń aıtýynsha, negizinen qoǵamda óz ornyn tappaǵan, alkogoldi ishimdikke áýes orta jastaǵy er adamdar joǵalady. Jaǵdaılardyń tórtten birinde kámeletke tolmaǵandar habarsyz ketken.
Birer kún buryn oblystaǵy bir aýdan ortalyǵynda polıtseıler 17 jastaǵy qyzdy izdep tapty. Onyń joǵalǵany týraly anasy júgingen. Qyzdy izdep tabýǵa jergilikti turǵyndar kómektesken. Ýchaskelik ınspektor WhatsApp-taǵy chatqa habarlama jibergen, chattaǵy adamdar joǵalǵan qyzdy aýyldardyń birinde kórgeni týraly jazǵan. Boıjetken oqýdyń ornyna tanystarymen ýaqyt ótkizbekshi bolǵan eken.
