SQO-da 360 eńbek zańnamasyn buzý deregi anyqtaldy
PETROPAVL. QazAqparat - Soltústik Qazaqstan oblysy memlekettik eńbek ınspektsııasy basqarmasynda alǵashqy jartyjyldyqta atqarylǵan jumystar qorytyndylandy, dep habarlaıdy QazAqparat tilshisi.
Aqparattyq-taldaý bóliminiń basshysy Meırambek Ahmetovtiń aıtýynsha, osy kezeń barysynda memlekettik ınspektorlar oblystaǵy 146 kásiporyn jáne uıymdardy tekserip, 360 eńbek zańnamasyn buzý deregi anyqtaldy.
Óńirde jalaqynyń keshigýi jıi kezdesetini anyqtaldy, sondaı-aq jumys berýshiler jumys qaýipsizdigine qajetti jaǵdaılardy jasamaı, jumysshylar arasynda eńbek qaýipsizdigin saqtaý boıynsha oqý jáne nusqamalyq ótkizbegen. Eńbek sharty mazmunynyń sáıkes emestigi, jumys ýaqyty normalarynyń buzylýy, jumysshylardy eńbek shartynsyz qabyldaý sııaqtylar da anyqtaldy.
«Eńbek zańnamasyn buzǵany úshin 59 laýazymdy jáne zańdy tulǵalar ákimshilik jaýapqa tartylyp, jalpy mólsheri 8,9 mln teńge bolatyn aıyppul salyndy», - deıdi bólim basshysy.
Jyl basynan beri óńirde óndiriste 41 oqys oqıǵa bolyp, sonyń ekeýi adam shyǵynyna ákep soqtyrǵan.
Memlekettik ınspektorlardyń málimetterine qaraǵanda, óndiriste jumysshylardyń jaraqat alýyna óndiristik jumystardy durys uıymdastyrmaý, zardap shegýshilerdiń eńbek jáne óndiristik tártipti óreskel buzýy, ǵımarattardyń tehnıkalyq jaǵdaıynyń máz bolmaýy sııaqty faktorlar jıi sebep bolady.
«Oqys oqıǵalardyń barlyǵy Qazaqstan Respýblıkasynyń zańnamasyna sáıkes tekserildi. Alǵashqy jartyjyldyqta eńbek qaýipsizdigi jáne eńbekti qorǵaý boıynsha 998 jumysshy oqytylyp, attestat berildi», - deıdi M. Ahmetov.
