SQO-da 36 tonna dızel tıelgen júk kóligi aýdaryldy
PETROPAVL. QazAqparat – Soltústik Qazaqstan oblysy Aqqudyq eldi mekeniniń mańynda 36 tonna dızel otynyn tıegen benzovoz jolda aýdarylyp qaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, jol-kólik oqıǵasy keshe 5 maýsym kúni saǵat 16.20 shamasynda Taıynsha aýdany Aqqudyq eldi mekeniniń mańynda bolǵan.
Aýylǵa burylysqa 10 shaqyrym jetpeı «VOLVO» júk kóliginiń júrgizýshisi rýlge ıe bola almaı qalyp, mashınany aýdaryp alǵan.
Onyń joldyń shetindegi jyraǵa túsip ketýine dóńgeleginiń isten shyǵýy sebep bolýy múmkin.
Kólikti Nur-Sultan qalasynyń 30 jastaǵy turǵyny basqarǵan.
Ol Ýálıhanov aýdany Kishkenekólden astanaǵa 36 tonna dızel otynyn apara jatqan eken.
Jol-kólik apaty jaıynda polıtseılerge kolonnada kele jatqan basqa júrgizýshiler habarlaǵan.
Oqıǵa ornyna patrýldi polıtsııa batalonynyń, jergilikti polıtsııa qyzmetiniń, ákimshilik polıtsııa jáne tótenshe jaǵdaılar bóliminiń mamandary jetti.
«Júk kóligindegi suıyq otyndy basqa mashınaǵa quıyp alyp, VOLVO-ny júk tıegishpen kóterip shyǵardyq. Saǵat 23.00 shamasynda órt sóndirýshilermen birge kólikti Aqqudyq aýylyna jetkizip saldyq. Benzovoz júrgizýshisi 7 saǵat boıy jolda júrdi», - deıdi SQO PD patrýldik polıtsııa batalonynyń ınspektory Saqtııar Ashmadıarov.
