SQO-da 36 eldi mekende jaryq joq
Soltústik Qazaqstan oblysynda 36 eldi mekenniń 2530 turǵyny jaryqsyz otyr. Onyń bir bóliginiń elektr qýatynan ajyratylǵanyna búgin altynshy táýlikke ketti, dep habarlaıdy Kazinform.
SQO ákimi Ǵaýez Nurmuhambetov oblystyq máslıhat depýtattary aldynda esep berdi. Óńir basshysy oblysta jaryqtyń jıi sónýine qatysty máselege de toqtaldy. 18 qarasha kúni bolǵan boranda elektr jelileri úzilgen aýyldardyń keıbiri áli kúnge deıin jaryqsyz otyr.
«Qolaısyz aýa raıynan 183 eldi mekende elektr energııasy sóndi. Oblysta barlyq qyzmetterdiń jumysyn úılestiretin Shtab jumys isteıdi. Birinshi kezekte barlyq áleýmettik nysandar baqylaýǵa alyndy, olardy úzdiksiz jylytý úshin rezervtik qýat kózine qosyldy.
«SevKazEnergo» AQ elektr tireginiń zaqymdanýyna baılanysty Maǵjan Jumabaev aýdany tolyǵymen qýatsyz qaldy. Býlaevo jáne qalaǵa jaqyn aýyldardy jedel túrde energııamen qamtamasyz etý úshin Reseımen kelissózder júrgizilip, ýaqytsha sheshim retinde kórshi elden qýattandyrý týraly kelisimge qol jetkizildi. Aýdannyń qalǵan bóligi Aqmola oblysynyń «Kókshetaý Energo» JShS-niń jelilerine jalǵandy.
Qazirgi ýaqytta «Kókshetaý Energo» kompanııasynyń jóndeý-avarııalyq brıgadalary 3 aýdannyń 10 aýylynda jumys júrgizip jatyr.
Sondaı-aq, «SevKazEnergo» AQ-nyń 46 jóndeý-avarııalyq brıgadasy jumysyn toqtatqan joq. Bul kompanııa 6 aýdannyń 30 aýylynda jóndeý jumystary júrgizip jatyr. Bul másele únemi baqylaýda», - dedi Ǵaýez Nurmuhambetov.
SQO Energetıka jáne turǵyn úı-kommýnaldyq sharýashylyǵy basqarmasynyń málimetinshe, qazirgi ýaqytta 9 aýdannyń 36 eldi mekeni jaryqsyz otyr. Bul aýyldarda 2530 turǵyn bar. Onyń birqatarynda jaryq keshegi boranda sónip qalǵan.
