SQO-da qaıtys bolǵannan keıin donor bolýǵa 350-ge jýyq adam kelisim berdi
PETROPAVL. KAZINFORM — Soltústik Qazaqstan oblysynda 348 turǵyn máıittik donorlyqqa kelisim berse, shamamen 1,5 myń adam donorlyqtan bas tartqan.
Mamandar halyqty organ donorlyǵy týraly aqparattandyrýdy mańyzdy baǵyttardyń biri retinde qarastyryp otyr.
SQO Densaýlyq saqtaý basqarmasynyń málimetinshe, qazir oblysta aǵza transplantatsııasyn qajet etetin 102 patsıent kútý paraǵynda tur. Olardyń 101-i — eresek adam, bireýi — bala. Patsıentterdiń basym bóligine búırek transplantatsııasy qajet.
— 102 adamnyń 87-sine búırek, 11-ine, onyń ishinde balaǵa baýyr, 2-eýine júrek, 1-eýine ókpe transplantatsııasy kerek. Taǵy bir patsıentke «júrek–ókpe» keshenin transplantatsııalaý qajet. Aǵzany aýystyrý kóptegen patsıent úshin ómirin saqtap qalýdyń jáne ómir súrý sapasyn jaqsartýdyń jalǵyz múmkindigi bolyp otyr. Alaıda qajetti aǵzany olar jyldap kútýi múmkin. Bul eń aldymen sáıkes keletin donordyń paıda bolýyna, medıtsınalyq kórsetkishterge jáne donor men retsıpıenttiń úılesimdiligine baılanysty, — deıdi SQO densaýlyq saqtaý basqarmasy basshysynyń orynbasary Nurılıa Qasenova.
Mamandardyń aıtýynsha, 2025 jyly óńirde eki máıittik donor tirkelip, olardyń týǵan-týystary aǵzalardy transplantatsııalaýǵa kelisim bergen. Nátıjesinde donorlyq aǵzalar jeti retsıpıentke transplantatsııalandy. Bıyl kóktemde SQO-lyq donor úsh patsıenttiń ómirin saqtap qaldy.
Sonymen qatar óńirde týysynyń syrqatqa donor bolyp, aǵza transplantatsııalaý múmkindigi de paıdalanylady. Ol tıisti medıtsınalyq kórsetilimder bolǵan jáne talaptarǵa sáıkes keletin donor anyqtalǵan jaǵdaıda júzege asyrylady. Máselen, sońǵy úsh jylda osyndaı 6 áleýetti donor anyqtaldy. Alaıda syrqat týystary qaıtys bolǵannan keıin olar donorlyqtan bas tartqan.
— Donorlyq aǵza kútý paraǵyndaǵy patsıentter arasynda kezdeısoq bólinbeıdi. Organdy transplantatsııalaýda medıtsınalyq kórsetkishter, donor men retsıpıenttiń úılesimdiligi, patsıenttiń densaýlyq jaǵdaıy jáne basqa da belgilengen krıterııler eskeriledi. Medıtsınalyq turǵydan sáıkes keletin patsıentke basymdyq beriledi, — deıdi Nurılıa Qasenova.
Mamandardyń aıtýynsha, qaıtys bolǵan adamnyń múshesin alý úshin týystarynan ruqsat alý qajet. Biraq, qazirgi tańda turǵyndar aǵza donory bolǵysy kelse, «Egov» portaly arqyly ótinish bere alady.
Buǵan deıin Qazaqstanda donorlyq aǵzaǵa muqtaj 4 739 adam, onyń ishinde 125 bala transplantatsııa kezeginde turǵanyn habarlaǵan edik.
Sondaı-aq Astanada bir donor úsh naýqasqa ómir syılaǵany týraly da jazdyq
