SQO-da 34 jastaǵy áıelge sońǵy qońyraý soǵyldy
34 jastaǵy Natalıa SQO boıynsha Qylmystyq-atqarý júıesi departamentiniń ES-164/6 mekemesinde jazasyn ótep jatyr. Búgin ol kolonııadaǵy orta bilimi joq basqa sottalǵandarmen birge «syrttaı keńes berý pýnktin», ıaǵnı mektepti támamdady. Osyǵan oraı túzetý mekemesinde kishigirim sońǵy qońyraý merekesi ótti.
«Munda túspes buryn 8 synyptyq bilimim boldy. Mekemede mektepti bitirip, attestat alýǵa múmkindik berdi. Endi kolledjge túsýdi josparlap otyrmyn, shashtaraz-vızajıst mamandyǵyn meńgergim keledi. Bostandyqta meni anam, kúıeýim, ulym, 84 jastaǵy ájem asyǵa kútip otyr. Búgin biz úshin qońyraý syńǵyrlady, tipti mektep bitirýshi túlektiń lentasyn da taqtyq, bári ózim kútkendeı. Alda mamandyq alyp, jumys istegim keledi. Jalpy josparym óte kóp, ómirimde bári jaqsy bolady», - deıdi Natalıa.
Jalpy bıyl SQO-nyń túzetý mekemelerindegi mektepterdi 17 sottalǵan aıaqtady.
«Bıylǵy oqý jylynda orta bilimi joq sottalǵan barlyq azamatty oqytýmen qamtydyq. Barlyǵy 77 jazasyn óteýshi oblys mekemelerindegi mektepte oqydy. Mekemege túsken sottalǵandar, eger olarda orta bilimi bolmasa, 35 jasqa deıin mektepti bitirýge mindetti, 35 jastan keıin sottalǵannyń qalaýy boıynsha mektepti támamdaýyna bolady. Oqý baǵdarlamasynda esh aıyrmashylyq joq, memlekettik emtıhandardy tapsyrǵannan keıin olarǵa attestat beriledi. Mekeme bazasynda 11-synyptan keıin sottalǵandar «Petropavl kásiptik kolledjinde» tiginshi, qaptaýshy, plıta salýshy jáne taǵy da basqa suranysqa ıe mamandyqtar boıynsha orta-arnaıy bilim ala alady. 9 jáne 11-synyptardyń attestatyn maýsym aıynyń sońyna qaraı beremiz», - dedi SQO boıynsha QAJD ES-164/6 mekemesiniń bastyǵy Qanat Súleımenov.
Byltyr oblystyń túzetý mekemelerinde 46 sottalǵan, 2022 jyly 77 sottalǵan bilim aldy. Eki jyl qatarynan 17 sottalǵan mektepti támamdady.
Jalpy búginde SQO mekemelerinde 1,5 myńnan astam sottalǵan jazasyn ótep jatyr.
