SQO-da 34 mln teńgeniń tuqymyn urlaǵandar 5,6 jylǵa sottaldy
PETROPAVL. KAZINFORM – Petropavl qalalyq soty asa iri kólemde urlyq jasaǵan úsh azamatqa qatysty qylmystyq isti qarap, úkim shyǵardy.

Soltústik Qazaqstan oblystyq sotynyń málimetinshe, qylmystyq is boıynsha aıyptalýshylar sany - úsheý. Olar aldyn ala sóz baılasý arqyly birlesip aýyl sharýashylyǵy daqyldaryn urlady dep aıyptaldy. Sonymen qatar sottalýshynyń bireýi - O.-ǵa qatysty aýyr qylmys týraly jasyryp qalǵany úshin de jeke aıyp taǵylǵan bolatyn.
Tergeý barysynda anyqtalǵandaı, M. jaýapkershiligi shekteýli seriktestiktiń astyq qabyldaý pýnktinde meńgerýshi qyzmetin atqara júrip, 2024 jylǵy 31 mamyrdan 1 maýsymǵa qaraǵan túni jáne 4 maýsymnan 5 maýsymǵa qaraǵan túni aldyn ala B.-men kelisip, kúzetshi O.-ǵa túngi ýaqytta aýmaqqa júk kólikteriniń kiretini týraly aıtqan. Osylaısha kúnbaǵys, bıdaı jáne zyǵyr tuqymyn urlap, jalpy somasy 34 mln teńgeden asatyn materıaldyq shyǵyn keltirgen.
Sottalýshylardyń kinási jábirlenýshi taraptyń ókilderi men kýágerlerdiń aıǵaqtarymen, sondaı-aq is materıaldaryndaǵy dáleldermen tolyq rastaldy. Prokýror men jábirlenýshi tarap árbir aıyptalýshyǵa naqty bas bostandyǵynan aıyrý jazasyn taǵaıyndaýdy surady. Alaıda aıyptalýshylar óz kinálaryn moıyndamaı, sottan aqtaýdy ótindi.
Sot úkimimen M. men B. kináli dep tanylyp, árqaısysyna 5 jyl 6 aı merzimge bas bostandyǵynan aıyrý jazasy taǵaıyndaldy. Sot B.-niń jas balasynyń bolýyn onyń kinásin jeńildetetin mán-jaı retinde eskerdi.
Al O.-ǵa qatysty qylmystyq quqyq buzýshylyq quramnyń bolmaýyna baılanysty sot ony kinásiz dep tanyp, aqtaý týraly sheshim shyǵardy.
Sot úkimi ázirge zańdy kúshine engen joq.
Buǵan deıin Petropavlda asa iri mólsherde bıýdjet aqshasyn jymqyrǵandar sottalǵanyn jazǵan edik.