SQO-da 300-ge jýyq ózen-kólderdiń sý qorǵaý aımaqtary áli belgilenbegen
PETROPAVL. KAZINFORM — Soltústik Qazaqstan oblysynda aldaǵy eki jylda 102 sý aıdynynyń mańynda sý qorǵaý aımaqtary men jolaqtaryn belgileý josparlanǵan.
Bul sý kózderin lastanýdan qorǵap, olardyń mańyndaǵy sharýashylyq qyzmetke qoıylatyn talaptardy naqtylaýǵa múmkindik beredi.
Esil basseındik sý ınspektsııasynyń málimetinshe, oblysta barlyǵy 595 eldi meken bar. Onyń 329-ynyń mańynda 340 ózen-kól ornalasqan. Olardyń jalpy jaǵalaý uzyndyǵy — 654,87 km.
Qazir 198 eldi meken aýmaǵyndaǵy 299 sý nysanynyń aınalasynda sý qorǵaý aımaqtary men jolaqtary tolyq belgilenbegen.
Mamandardyń aıtýynsha, mundaı aımaqtardy belgileý eń aldymen sý nysandary ornalasqan eldi mekender úshin mańyzdy. Sebebi sýǵa jaqyn aýmaqta qandaı jumystar júrgizýge bolatyny, qandaı qyzmet túrlerine shekteý qoıylatyny naqty anyqtalady.
— Oblysta bul baǵyttaǵy jumystar kezeń-kezeńimen júrgizilip keledi. Atap aıtqanda, 266 eldi mekende ornalasqan 56 sý aıdyny boıynsha sý obektilerin sharýashylyq maqsatta paıdalaný rejımin belgileýge arnalǵan jobalar memlekettik saraptamadan ótken. Taǵy 11 sý nysany boıynsha jobalar ázirlenip jatyr, — deıdi deıdi Sý resýrstaryn retteý, qorǵaý jáne paıdalaný jónindegi Esil basseındik sý ınspektsııasy basshysynyń orynbasary Gúlden Ismaǵulova.
Bul jumystardy qarjylandyrýǵa 2026-2027 jyldarǵa jalpy 665 mln 160 myń teńge qarastyrylǵan. Onyń ishinde kelesi jyly taǵy 51 sý nysany boıynsha jobalardy ázirleýge 332 mln 580 myń teńge bólý josparlanǵan.
Buǵan deıin Esil basseıninde sý zańnamasyn buzǵandarǵa 12 mln teńgege jýyq aıyppul salynǵanyn jazǵan edik.
