SQO-da 300-ge jýyq eldi mekende órt shyqqanda sý alatyn balama kózder qarastyrylmaǵan
PETROPAVL. KAZINFORM – Soltústik Qazaqstan oblysynda órt qaýipti kezeńge daıyndyq barysy pysyqtaldy.
«AMANAT» partııasy SQO fılıaly baspasóz qyzmetiniń málimetinshe, órttiń aldyn alý jáne tilsiz jaýmen kúreske daıyndyq máselesin depýtattyq fraktsııanyń jáne partııalyq baqylaý komıssııasynyń músheleri talqylady.
SQO TJD memlekettik órt baqylaý basqarmasynyń bastyǵy Aslan Ahmetjanovtyń aıtýynsha, jergilikti atqarýshy organdar 285 eldi mekende sýmen qamtamasyz etýdiń balama kózderin salý máselesin tıisti deńgeıde sheshpegen. ıAǵnı órt bola qalǵan jaǵdaıda sý alatyn uńǵymalar, qoldan jasalǵan sý qoımalary joq. Sondaı-aq, sý alý úshin arnaıy pırster de salynbaǵan. Aýyldardyń keıbiri qýraǵan shópten, qamystan jáne basqa da tez tutanatyn kúl-qoqystan durys tazartylmaǵan. Sonymen qatar avtomobıl joldarynyń boıynda mıneraldanǵan jolaqtardy salý boıynsha jumys baıaý júrip jatyr.
«Eldi mekenderdiń aınalasynda qaýipsizdikti qamtamasyz etý úshin 2 177 km mıneraldanǵan jolaq salyný qajet. Búginde sonyń 1 678 shaqyrymynda ǵana arnaıy jolaq bar. Orman alqaptarynyń aınalasy da áli kúnge deıin jyrtylyp bolǵan joq. Órt shyqqan jaǵdaıda qaýipti aımaqtardan adamdar men maldy evakýatsııalaý máselesine erekshe nazar aýdarý qajet. Alaıda birde-bir aýdan ýaqytsha evakýatsııalaý oryndaryn belgilegen joq», - deıdi Aslan Ahmetjanov.
Bıyl profılaktıkalyq is-shara barysynda órt qaýipsizdigi erejelerin buzǵany úshin 117 adam ákimshilik jaýapkershilikke tartyldy.
Tabıǵı resýrstar jáne tabıǵatty paıdalanýdy retteý basqarmasynyń málimetinshe, qazir orman sharýashylyqtarynda 14 órt sóndirý stantsııasy, 25 órt sóndirý avtomashınasy, tirkemeli quraldary bar 87 traktor, 30 tsısterna daıyn. Órt bola qalǵan jaǵdaıda lezde habarlaıtyn 810 radıostantsııa bar. Sonymen qatar, 16 ınteraktıvti beınebaqylaý júıesi jumys isteıdi. Munymen qosa, ormandy baqylaý úshin 3 dron paıdalanylady. 80 tonna kóleminde janar-jaǵarmaı materıaldary qory jasaqtaldy.
Buǵan deıin SQO-da 50 jastaǵy jumysshynyń qolynyń basy julynyp qalǵanyn jazǵan edik.
