SQO-da 30 shaqty júrgizýshi ómir boıy kólik basqarý quqyǵynan aıyryldy
PETROPAVL. QazAqparat – Soltústik Qazaqstan oblysynda bıyl 29 adam kólikti ómir boıy basqarý quqyǵynan aıyryldy, olar rýlge mas kúıde otyrǵan, dep habarlaıdy «QazAqparat» HAA tilshisi.
SQO Polıtsııa departamenti baspasóz qyzmetiniń málimetinshe, mas kúıde kólik basqarǵandarǵa sot kóbine bas bostandyǵyn shekteýge úkim shyǵarady. Al materıaldyq zalal nemese densaýlyqqa jeńil zııan keltirgen jaǵdaıda kólik júrgizýshiler bas bostandyǵynan aıyrylady. Jyl basynan oblysta eki adamǵa osyndaı qatań jaza qoldanyldy.
Qyzyljar aýdanynyń 29 jastaǵy turǵyny «Chelıabi-Novosibir» tas jolynda óziniń «Audi-80» kóligimen «Lada 217030» avtomashınasyn basyp ozamyn dep eki jylǵa bas bostandyǵynan aıyryldy. Shilde aıynda Qyzyljar aýdanynyń 37 jastaǵy taǵy bir turǵyny sottaldy. Ol qonaqqa kelgen tanysymen ishimdik ishken. Keıin tanysynyń «VAZ 21144» avtokóligine otyryp, aýdaryp tastaǵan.
«Іshimdik iship jolǵa shyqqandar adamdardyń ómirine qaýip tóndiredi. Bıyl 11 qańtardan qylmystyń atalǵan túri úshin jaýapkershiliktiń qatańdatylǵanyn avtojúrgizýshilerge taǵy bir ret eskertkendi jón dep esepteımin. Endi, negizgi jazadan bólek, qylmyskerler avtokólik basqarý quqyǵynan ómir boıyna aıyrylady», - deıdi SQO PD bastyǵynyń orynbasary Eńbek Sembın.
