SQO-da 30 oqýshydan koronavırýs anyqtaldy
PETROPAVL. QazAqparat – Soltústik Qazaqstan oblysynda jańa oqý jyly bastalǵaly 30 oqýshydan koronavırýs ınfektsııasy anyqtaldy, dep habarlaıdy QazAqparat tilshisi.
SQO Taýarlar men kórsetiletin qyzmetterdiń sapasy men qaýipsizdigin baqylaý departamenti medıtsınalyq kómektiń sapasy men táýekelderin baǵalaý bóliminiń basshysy Arman Kúshbasov brıfıngide 30 oqýshy koronavırýspen aýyrǵanyn atap ótti.
«15 bala kezekshi synyptarǵa barǵan, qalǵan 15-i qashyqtan bilim alady. Olardyń barlyǵy, sonymen birge balalarmen baılanysta bolǵandar tekserildi. Oqýshylar arasynda synybymen aýyrǵandar joq. Kezekshi synyptar karantınge jabylǵan joq», - deıdi Arman Kúshbasov.
Mamannyń aıtýynsha, ujymda, sonyń ishinde balabaqsha tobynda KVI juqtyrý anyqtalǵan jaǵdaıda, onymen jaqyn baılanysta bolǵandardyń barlyǵy tekseriledi.
«Balabaqshada tárbıeshi men kútýshiden basqa eshkimniń topqa kirýge quqy joq. Juqtyrǵan adam anyqtalǵan jaǵdaıda, barlyǵy karantınge ketedi. Jaqyn baılanysta bolǵandar biri qalmaı tekseriledi. Balabaqshada bolsa toptyń tárbıelenýshileri, kútýshi, tárbıeshi jáne balalardyń ata-analary da tekseriledi», - deıdi sanıtarııalyq dáriger.
Buǵan deıin 16 qazannan bastap SQO-da karantındik shekteýlerdiń kúsheıtiletinin aıtqan edik. Oblystyń bas sanıtarııalyq dárigeriniń jańa qaýlysyna sáıkes, oblysta birqatar nysandardyń jumys kestesine ózgertý engizildi.
Sondaı-aq KVI juqtyrǵandardyń ınkýbatsııalyq kezeńde 3-5 adamnan asyp ketýine baılanysty taǵy úsh eldi mekende turǵyndardyń júrip-turýy shekteldi.
