SQO-da 30 myńǵa jýyq shaǵyn jáne orta bıznes sýbektisi jumys isteıdi
PETROPAVL. QazAqparat – Soltústik Qazaqstan oblysynda 34 myńnan astam shaǵyn jáne orta bıznes sýbektisi tirkelse, sonyń shamamen 66%-i — jeke kásipkerlik, dep habarlaıdy QazAqparat tilshisi.
SQO statıstıka departamentiniń málimetinshe, tirkelgen shaǵyn jáne orta bıznes sýbektileriniń otyz myńǵa jýyǵy turaqty túrde jumys isteıdi. Máselen, olar qańtar-naýryz aılarynda 80,7 mlrd teńgeniń ónimin shyǵarǵan. Olar 100 myńǵa jýyq adamdy jumyspen qamtyp otyr.
Jeke kásipkerlik sýbektileri Petropavldan keıin negizinen Qyzyljar aýdanynda shoǵyrlanǵan. Solardyń biri - aǵashtan jıhaz jasaıtyn «Levın» jeke kásipkerligi «Bıznestiń jol kartasy – 2020», «Qarapaıym zattar ekonomıkasy» memlekettik baǵdarlamalary aıasynda 20-30 jyl burynǵy qondyrǵylaryn jańartyp jatyr.
«Bizdegi jumysshylardyń 30 %-i 15-20 jyldan artyq eńbek etip jatyr. Otbasylarymen – kúıeýi, áıeli, balasy birge jumys isteıtinder bar. Eńbekaqylary jaqsy, ortasha 120 myń teńge alady. Áleýmettik paket qarastyrylǵan. Aýqattanýǵa arnaıy jaraqtandyrylǵan bólme bar», - deıdi tseh basshysy Irına Klımenko.
Beskól aýylynda ornalasqan kásiporyn ashana stoldary men oryndyqtaryn jasaıdy. Jergilikti qaıyń men qaraǵaıdan isteletin ónim básekege qabiletti, sol sebepti suranys ta joǵary. Qazir kásiporynda toqsannan astam qondyrǵy bolsa, sonyń 60 % aýystyrýdy qajet etedi. Olar «Bıznestiń jol kartasy – 2020», «Qarapaıym zattar ekonomıkasy» baǵdarlamalary aıasynda memlekettiń qoldaýyn kórip otyr. Satyp alynǵan qondyrǵylarǵa demeýqarjy bar.
«Bıyl indetke qaramastan jumysymyzdy jalǵastyryp jatyrmyz. Eski bildekterdi jańa qondyrǵylarǵa aıyrbastaı bastadyq. Nátıjesinde tehnologııany jaqsartyp, ónim shyǵarý ýaqytyn qysqarttyq. Elektr qýaty únemdeledi. Bir qondyrǵy eski tórt bildekti aýystyrady. Bıylǵy Joldaýdy tyńdadym, shaǵyn jáne orta bıznes áli de memleket qoldaýynsyz qalmaıtyny qýantty. «Bıznestiń jol kartasy» taǵy bes jylǵa sozylatyn bolyp jatyr, ıaǵnı, sýbsıdııalar jalǵasady. Bizge jumysymyzdy alǵa bastyrýǵa, damytýǵa bul úlken sep», - deıdi «Levın» JK dırektorynyń orynbasary Evgenıı Levın.
Otbasylyq shaǵyn bıznes búginde oblysqa ǵana emes, respýblıkaǵa tanymal brendke aınaldy. Qazir munda jergilikti turǵyndardan 100 adam eńbek etedi.
