SQO-da 30 mektep memlekettik attestatsııaǵa qatysyp, jartysynan astamy synnan óte almady

PETROPAVL. QazAqparat – Soltústik Qazaqstan oblysynyń bilim salasynda sapany qamtamasyz etý departamenti jarty jyldyqty qorytyndylap, nátıjesin óńirlik kommýnıkatsııalar qyzmetinde ótken brıfıngte jarııalady, dep habarlaıdy QazAqparat tilshisi.

SQO bilim salasynda sapany qamtamasyz etý departamentiniń basshysy Alena Malgaevanyń aıtýynsha, jyl basynan memlekettik attestattaý 30 mektepte ótkizildi, onyń ishinde 17 mektep attestattalmady.

«Ótken jylmen salystyrǵanda bıyl memlekettik attestattaýdan ótken orta bilim berý uıymdarynyń sany ósken. Desek te mektepterde memlekettik jalpy mindetti bilim standarty talaptary tolyq kólemde saqtalmaıdy. Erekshe bilim berý qajettilikteri bar balalarǵa arnaıy oqytý jaǵdaılary jasalmaıdy: jeke jumys josparlary joq, psıhologııalyq-áleýmettik qyzmettiń jumysy, ınklıýzıvti bilim berý talaptary baıqalmaıdy.

Biliktilik talaptary máselesi ózekti bolyp qala beredi. Máselen keı pedagogterdiń bilimi oqytatyn pánine sáıkes kelmeıdi. Ustazdardyń attestattaýdan ótý merzimderi de saqtalmaǵan. Ashananyń sanıtarlyq normalarǵa sáıkes kelmeýi, sanıtarıalyq-epıdemıologııalyq qorytyndynyń bolmaýy, oqý úı-jaılarynyń sanıtarlyq normalar men órt qaýipsizdigi erejelerine sáıkes kelmeýi, bilim boıynsha qanaǵattanarlyqsyz nátıje, formatıvti jáne jıyntyq baǵalaý talaptarynyń saqtalmaýy anyqtaldy», - deıdi Alena Malgaeva.

Memlekettik attestattaý aldynda mektepterde 4,9 synyp oqýshylary keshendi testileýden ótedi. Búginde keshendi testileý 51 mektepte boldy.

«Jaqsy nátıjelerdi Aıyrtaý aýdany Dáýkara orta mektebiniń 4 synyp oqýshylary kórsetti, barlyǵy 30 ball bolsa, balalar ortasha 27 ball aldy. Ǵ.Músirepov atyndaǵy aýdannyń Býdennovskoe orta mektebiniń 9 synyp oqýshylarynyń ortasha kórsetkishi – 50. Barlyǵy 60 ball boldy.

Al M.Jumabaev aýdanynyń Qyzyl-Qazaqstan negizgi orta mektebiniń 4 synybynda ortasha kórsetkish 11 ǵana, Taıynsha aýdanynyń Kırov orta mektebiniń 9 synybynda ortasha ball 20 ǵana boldy», - deıdi departament basshysy.

Attestattalmaǵan bilim berý uıymdary anyqtalǵan olqylyqtardy joıý josparyn jáne olardy joıý merzimin aıqyndaıdy, tek sosyn qaıta qorytyndy jasalady.

Jyl basynan 48 mektep qaıta attestattaýdan ótti, onyń ekeýi: Aıyrtaý aýdanynyń Aqan-Burlyq bastaýysh mektebi jáne Aqqaıyń aýdanynyń Kýıbyshev bastaýysh mektebi eskertýlerdi túzetpegen. Zańnamaǵa sáıkes olarǵa endi mamandar baryp profılaktıkalyq baqylaý júrgizbek.