SQO-da 30 qoı urlady degen kúdikpen jeti jigit ustaldy

Soltústik Qazaqstan oblysynda jeti jigit jaz boıy jurttyń qorasyna túsip, qoı urlap kelgen. 31 qoıdy qoldy etken kúdiktiler qolǵa tústi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, qolǵa túsken kúdiktilerdiń jasy 18 ben 22 aralyǵynda. Urlyqty kásip etken jigitterdi Esil aýdany polıtsııa bóliminiń qyzmetkerleri ustap, qazir tergeý júrgizip jatyr.

Búgingi kúni iste 10 epızod bar. Qylmystar bıyl jazda Esil aýdanynda, taǵy eki fakti Mamlıýt jáne Shal aqyn aýdandarynda jasalǵan.

Qylmyskerler aýyl turǵyndarynyń qora-qopsyna kirip, qoı urlaǵan. Bir urlaǵanda 6 qoıdy alyp ketip otyrǵan.

Tamyz aıynda jedel izdestirý sharalarynyń nátıjesinde polıtseıler oblystyń kúdikti jeti turǵynyn ustady.

Tergeý barysynda olardyń urlanǵan maldardyń etin Petropavlda satqany anyqtaldy. Satyp alýshydan tórt qoı tárkilendi.

Maly urlanǵan turǵyndar polıtsııaǵa aryzdanbaǵan. Olar qoılary qoradan ózderi shyǵyp joǵalyp ketken bolýy múmkin dep oılaǵan.

Birqatar fakti tek tergeý barysynda ǵana anyqtaldy.

Sońǵysy 19 qyrkúıek kúni tirkeldi. Barlyǵy 31 qoıdyń urlanǵany belgili boldy.

Kúdiktiler qamaýǵa alyndy. QR Qylmystyq kodeksiniń 188-1-babynyń 3-bóligi «Mal urlaý» boıynsha tergeý júrip jatyr.