SQO-da 30-ǵa jýyq sábıge «Súıinshi» syıqoraby tartý etildi

PETROPAVL. QazAqparat – Soltústik Qazaqstan oblysynda Táýelsizdik kúni dúnıege kelgen 26 sábıge el Táýelsizdiginiń 30 jyldyq mereıtoıyna oraı baby-bokstar syıǵa berildi, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy KE AQ SQO boıynsha fılıaly baspasóz qyzmetiniń málimetinshe, óńirde 16-17 jeltoqsan kúnderi 26 sábı dúnıe esigin ashty. Olardyń barlyǵyna bóbekterge qajetti zattary bar «Súıinshi» syıqoraby tartý etildi. Sondaı-aq baby-bokstarda QR Prezıdenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» mereıtoılyq monetasy men balanyń alǵashqy qujaty - týýy týraly kýáligi salynǵan.

«Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!», - dep jazylǵan Prezıdenttiń quttyqtaýynda.

16 jáne 17 jeltoqsanda týǵan balalarǵa týý týraly kýálikti alý týraly ótinimderdi «Azamattarǵa arnalǵan úkimet» memlekettik korporatsııasynyń qyzmetkerleri qabyldap, ári qaraı qujatyn resimdeý úshin azamattardyń hal aktilerin tirkeý organdaryna joldandy.

Aıta ketý kerek, «Súıinshi» syıqoraptaryn QR Tsıfrlyq damý, ınnovatsııalar jáne aeroǵarysh mınıstrligi «Azamattarǵa arnalǵan úkimetpen» birge jáne QR Ulttyq bank, Tsentrkredıt banki jáne «Qazposhta» AQ qatysýymen uıymdastyrdy.

Petropavlda «Súıinshi» syıqorabyn aǵashqylardyń biri bolyp Ásemgúl Sadýlova aldy. Ol 16 jeltoqsanda ulyn dúnıege ákeldi. Baby-boksty jas anaǵa «Azamattarǵa arnalǵan úkimet» memlekettik korporatsııasy KE AQ SQO boıynsha fılıalynyń dırektory Jánibek Qambarov jáne «Qazposhta» AQ SQOF dırektorynyń orynbasary Ǵanı Jarasbaı tabys etti.

Bul kúni baby-bokstar oblystyq perınataldyq ortalyqqa da jetkizilip, mereke kúni ómirge sábı ákelgen analarǵa taratyldy.