SQO-da 30-dan astam ınternet alaıaqtyqqa qatysy bar bes «dropovod» sottaldy

SQO Polıtsııa departamenti baspasóz qyzmetiniń málimetinshe, olar byltyr shilde aıynda ustalǵan. Tergeý barysynda olardyń ınternet alaıaqtyqtyń 31 epızodyna qatysy bar ekeni anyqtalǵan.

Shetelde otyrǵan alaıaqtar qazaqstandyqtarǵa uıaly baılanys operatorlarynyń, bank qyzmetkerleriniń jáne basqa uıymdardyń atynan habarlasqan. Ártúrli syltaýmen olar adamdardy SMS-habarlamalardaǵy kodtardy aıtýǵa kóndirgen.

Keıin qylmystyq tizbek boıynsha basqalary jábirlenýshilerdi áldekimder olardyń qarjysyna qaýip tóndirip jatyr dep sendirip, iri mólsherde nesıe rásimdeýge jáne qarajatty kórsetilgen «qaýipsiz shottarǵa» aýdarýǵa májbúrlegen.

Shyndyǵynda bul shottar «droptarǵa» tıesili bolǵan. Qarajat solardyń shottary arqyly Qazaqstannan tys jerlerge shyǵarylyp otyrǵan. Al osy droptardy taýyp, qylmystyq áreketke tartýmen bes soltústikqazaqstandyq aınalysqan. Olar árbir tranzaktsııadan belgili bir paıyz alyp otyrǵan.

Mamyr aıynda sot úkimimen «dropovodtar» ártúrli merzimge - 6 jyl 8 aıdan 2 jylǵa deıin bas bostandyǵynan aıyryldy.

Sonymen qatar sot jábirlenýshilerdiń talap-aryzdarynyń bir bóligin qanaǵattandyrdy. Endi sottalǵandar birqatar epızod boıynsha keltirilgen zalaldy óteýge mindetti. Bir jaǵdaıda onyń mólsheri 22 mln 800 myń teńge bolǵan. Petropavldyq áıel alaıaqtarǵa aldanyp, poshta jóneltilimin alý úshin qajet dep sendirgen soń, kodty aıtyp, bar jıǵan-tergeninen aıyrylǵan.

Úkim zańdy kúshine engen joq.

Buǵan deıin SQO-da «ınvestıtsııaǵa» qarjy salǵan zeınetker 7 mln teńgesinen aıyrylǵanyn jazǵan edik.