SQO-da 30-dan astam adamdy kene shaqsa, onyń jartysyna jýyǵy - balalar
PETROPAVL. QazAqparat – Soltústik Qazaqstan oblysynda sáýir aıynyń basynan beri 31 adamdy kene shaqqan, olardyń jartysyna jýyǵy 14 jasqa deıingi balalar, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamentiniń málimetinshe, bıyl 31 adamdy kene shaqsa, bul ótken jyldyń osy aralyǵymen salystyrǵanda 36 %-ǵa tómen.
Dárigerge qaralǵan olardan kene entsefalıti anyqtalmady.
«Kene entsefalıti qaýipti ınfektsııalyq aýrý. Ortalyq júıke júıesin zaqymdaıdy. Iksodty kene shaqqan jaǵdaıda adam múgedek bolyp, tipti ólip ketýi de múmkin. Aýrý tek 2-10 kún aralyǵynda ǵana baıqala bastaıdy. Dene qyzýy 39-40 gradýsqa deıin kúrt kóteriledi, bas aýyryp, álsizdik bolady, dene bórtip ketedi», - deıdi SQO SEBD bóliminiń bas mamany Saltanat Bekqojına.
Mamandardyń aıtýynsha, zııandy jándikten qorǵanýdyń eń tıimdi joly - vaktsına alý.
Ekpe ańshylar men balyqshylarǵa, orman men saıajaıda eńbektenetin jandarǵa tegin salynady.
Bıyl kene, masa-shybynmen kúresý úshin SQO-da dezınsektsııalyq jumystarǵa 5 mln teńge bólindi. Jumys sáýir aıynyń sońynda bastaldy.
Al mamyr aıynda 689 ga jer óńdelmek.
Olar – Petropavldaǵy saıabaqtar, N.Pogodın atyndaǵy drama teatry mańyndaǵy jáne Cheremýshkı shaǵyn aýdanyndaǵy jasyl jelekter, Meşan ormany, 19-20 yqsham aýdan, Rabochıı, Jumysshy kentterindegi aınalma joldar, Oıqala jáne Bylǵary zaýytyndaǵy jol shetindegi kólder men Novopavlovka eldi mekeninde ornalasqan zırat.
Sondaı-aq Aıyrtaý aýdanyndaǵy demalys oryndary da zııandy jándikterge qarsy zararsyzdandyrylady.
