SQO-da 30-dan astam adam qar keptelisinen shyǵaryldy
PETROPAVL. QazAqparat – Soltústik Qazaqstan oblysynda ótken aptada 7 qar keptelisi oqıǵasy bolǵan. Bul týraly brıfıngte tótenshe jaǵdaılar jónindegi departamenttiń krızıstik jaǵdaılar basqarmasynyń basshysy Rústem Jumaǵalıev málim etti, dep habarlaıdy QazAqparat tilshisi.
Ótken aptada aımaqtaǵy jaǵdaı aýa raıyna baılanysty kúrdeli boldy. Burqasyn saldarynan tórt ret joldar jabyldy. Sondaı-aq óńirdiń keıbir turǵyndary qutqarýshylardyń eskertýlerine qaramastan, eldi mekenderden tys jerlerge shyqqan. Sonyń saldarynan 37 adam, onyń ishinde 6 bala qar qursaýyna túsip, qutqarylǵan.
Ǵ.Músirepov atyndaǵy, Esil, Aıyrtaý, M.Jumabaev atyndaǵy, Tımırıazev aýdandary qar qursaýynda qalǵan.
«Jaqynda ǵana Tımırıazev aýdanyna «Nıva-Bronto» markaly avtokóligi tapsyryldy. Aýdan alys, munda qar keptelisi jıi bolady. Eldi mekender kólik quraldarynsyz qalady. Naýqastardy jedel jetkizý nemese shuǵyl járdem kórsetý kerek bolǵan jaǵdaıda osy avtokólik qatynaıtyn bolady. Jyl basynan beri jeti ret aýdanǵa baryp kelgen», - dedi R.Jumaǵalıev.
Aldaǵy aptada sınoptıkterdiń boljaýynsha, aımaq turǵyndaryna aýa raıynyń jaqsarýyna úmit artýdyń qajeti joq. Jaýyn-shashyn, boran, jel kúsheıýi múmkin. Qutqarýshylarǵa aýa raıyna baılanysty eskertýlerge nazar aýdarýǵa jáne alys saparlardy josparlamaýǵa keńes beredi.
