SQO-da 3 jasar qyzyn uryp óltirgen kelinshek sottaldy
SQO kámeletke tolmaǵandardyń isi boıynsha mamandandyrylǵan aýdanaralyq soty 3 jasar qyzyn uryp óltirgen Ekaterına Goleshovaǵa úkim shyǵardy. 22 jastaǵy kelinshek birden 3 bap boıynsha aıyptalǵan edi.
Sot ony kináli dep tanyp, áıeldi 10 jyl 6 aıǵa bas bostandyǵynan aıyrdy.
Jantúrshigerlik oqıǵa bıyl qańtar aıynyń sońynda boldy. Ekaterına Goleshova 3 jasar týǵan qyzyn ólimshi etip sabap, sábı oblystyq balalar aýrýhanasynyń reanımatsııa bólimshesine tústi.
Denesinde saý jeri qalmaǵan kishkentaı Sasha bir aıdan artyq komada jatty.
Dárigerler balanyń ómiri úshin kúreskenimen, sábı alǵan jaraqatynan tilge kelmesten qaıtys boldy .
Aleksandra Zaharova dúnıege tserebraldy paralıch aýrýymen kelgen. Anasy Ekaterına qyzynan bas tartyp, sábıler úıine ótkizedi.
Biraz ýaqyttan keıin qyzdy áıeldiń alys týysy Zaharovtar otbasy qamqorlyǵyna almaq bolady. Týǵan anasy sábıden bas tartyp, qolhat ta jazǵan.
Alaıda aı saıyn 92 myń teńge járdemaqy tólenetindigin bilgen áıel múgedek qyzdy qaıtaryp alǵan.
Qatygez kelinshek Sashany qolǵa alǵan kúnnen bastap soqqyǵa jyqqan. Sot áıeldiń jasaǵan qylmysyn bir saǵat boıy tizdi.
«23 jastaǵy oblys ortalyǵynyń turǵyny Ekaterına Goleshova óziniń 3 jasar qyzyn birneshe kún boıy aıaýsyz urǵan. Tserebraldy paralıch derti bar sábıdi aıaqqa turǵyzyp, júrýge májbúrlegen. Onyń jylaǵanyna qaramastan birneshe ret ıterip, basynan urǵan. Saldarynan basynyń oń jaq bóliginde sýbdýraldy gematoma paıda bolǵan, basyna qan ketip, denesi kógergen, shashy julynǵan, tilinde de birneshe jaraqat boldy jáne tisteriniń synǵany anyqtaldy», - dedi SQO kámeletke tolmaǵandardyń isi boıynsha mamandandyrylǵan aýdanaralyq sottyń sýdıasy Álııa Jumabaeva.
Sashany asyrap almaq bolǵan Tatıana Zaharova týǵan qyzyn aıaýsyz uryp óltirgen áıel úshin sottyń úkimi óte jeńil jaza dep esepteıdi.
«Osyndaı qylmys úshin bul elimizdegi eń aýyr jaza dep esepteledi. Alaıda, eger ol 20-25 jyl nemese jazasyn ómir baqı óteıdi degendi estisem de, kóńilim tolmas edi. Meniń oıymsha, Goleshova óz kinásin moıyndamady», - deıdi Tatıana Zaharova.
Ekaterına Goleshova jazasyn ortasha qaýipsiz mekemede óteıdi.