SQO-da 3 týysyn pyshaqtaǵan er adam sottalyp jatyr

PETROPAVL. QazAqparat – Soltústik Qazaqstan oblysyndaǵy qylmystyq ister boıynsha mamandandyrylǵan aýdanaralyq sotta bir otbasynyń úsh múshesin pyshaqtaǵan er adamǵa qatysty sot otyrysy bastaldy, dep habarlaıdy QazAqparat tilshisi.

Úsh týysyn pyshaqtaǵan Bekbolat Ǵabdýllınge «Óltirý» jáne «Ómirge qastandyq jasaý» baptary boıynsha aıyp taǵylǵan.

Qaıǵyly jaǵdaı bıyl naýryz aıynda Petropavlda bolǵan edi. Týystaryna kelgen 30 jastaǵy Almaty turǵyny Bekbolat Ǵabdýllın araqtyń býyna elitip, otbasynyń úsh múshesin pyshaqtap tastady. Úsheýi de aýrýhanaǵa jetkizilgenimen, dárigerler ekeýiniń ómirine arasha túse almady.

48 jastaǵy áıel ota jasaý barysynda qaıtys boldy. 89 jastaǵy keıýana da aýrýhanada tilge kelmesten kóz jumdy. Onyń 28 jastaǵy nemeresi, qaıtys bolǵan áıeldiń balasy túrli pyshaq jaraqatyn aldy.

Úıde sol kúni jigittiń áıeli men qaryndasy bolǵan. Olar aman qaldy.