SQO-da 3 sý qoımasynda ottegi jetpegennen balyq qyrylǵan

PETROPAVL. QazAqparat – Soltústik Qazaqstan oblysyndaǵy úsh sý qoımasyna qatysty saraptama nátıjesi keldi. Móńke balyǵy ottegi jetpeı qyrylǵan, dep habarlaıdy QazAqparat tilshisi.

SQO boıynsha balyq sharýashylyǵy ınspektsııasy bóliminiń jetekshisi Ildar Kákimovtyń aıtýynsha, jumys tobynyń otyrysynda Býgrovoe, Prýd kólderinde jáne Chaglınka ózeninde balyq qyrylý jaǵdaılary qaraldy.

Mamandardyń boljamy rastaldy. Bir apta buryn alynǵan saraptama sý jándikteriniń taıaz kólderdiń túbine deıin qatýynan aýa jetpeı ólgenin kórsetti.

Tek Býgrovoe kólinde 300 kg móńke balyǵy qyryldy.

«SQO-da osy kúnge deıin 7 kólde balyq qyrylǵanyn anyqtadyq. Barlyq jaǵdaıda da oqıǵa ornyna bardyq, tekserdik. Sońǵy ret keshegi kúni Aıyrtaý aýdany Quspek kólinde 1 ts balyq qyryldy. 2021 jyly kóldi qoldanýshy oǵan sıg balyǵynyń dernásilin jiberdi. Osylaısha balyqty kóbeıtpek boldy, qysta melıoratıvti jumystar júrgizip, ottegimen baıytty. Biraq aeratsııa kómektespedi, balyq qyrylyp qaldy. ıAǵnı aldyn ala boljam boıynsha, sý jándikterine aýa jetpegen. Tıisti saraptamalar alyndy. Biz ol balyqtar qysty kúni ólip, sý betine endi shyǵyp jatyr degen pikirdemiz», - deıdi Ildar Kákimov.

Byltyr óńirde qýańshylyq boldy. Mamannyń pikirinshe, bul shaǵyn kólder sýynyń tartylýyna áser etken. Saldarynan aeratsııa nátıje bermegen.

Esterińizge salaıyq, buǵan deıin Qyzyljar aýdany Býgrovoe kólinde balyq qyrylyp, mamandardyń oqıǵa ornynda jumys istep jatqanyn aıtqan edik.

Birer kúnnen keıin Aıyrtaý, Qyzyljar, Taıynsha aýdandarynyń shaǵyn kólderinen jáne Petropavl mańyndaǵy Pestroe kólinen ólgen móńke balyǵy tabyldy.