SQO-da 3 myń adam maskúnem retinde polıtseıler esebinde tur

PETROPAVL. QazAqparat – Soltústik Qazaqstan oblysynda tirkelgen barlyq qylmystardyń shamamen ár úshinshisine ishimdik ishkenderdiń qatysy bar. Byltyr adam óltirýdiń 29 deregi tirkelse, sonyń 26-sy mas kúıde jasalǵan, dep habarlaıdy QazAqparat tilshisi.

SQO polıtsııa departamentiniń bastyǵy Aıdyn Qabduldınov áleýmettik jeli arqyly tikeleı efırge shyǵyp, ótken jyldy qorytyndylady. Óńir tártip saqshylarynyń aldyna qoıylǵan basym baǵyttar men josparlar týraly aıtyp berdi.

«Taldaýǵa sáıkes, elimizde tirkelgen barlyq qylmystardyń keminde 3%-y SQO úlesinde. Óńirdegi jedel jaǵdaı turaqty. Sońǵy 8 jyl ishinde qylmystardy tirkeý tómendegen. Qazirgi basty másele – maskúnemdik. Ótken jyly mas kúıde 676 qylmys jasalǵan, bul – barlyq tirkelgen qylmystardyń 27%-y. Adam óltirýdiń 29 faktisi tirkelse, 26-sy mas kúıde jasalǵan. Bul densaýlyqqa zııan keltirý, buzaqylyqqa jáne basqa da qylmystarǵa qatysty», - dedi Aıdyn Qabduldınov.

Qazirgi ýaqytta SQO polıtsııasynyń esebinde alkogoldik ishimdikke táýeldi 3 myńǵa jýyq adam bar. Byltyr 219 maskúnem májbúrli emdeýge jiberilgen.

Aıdyn Qabduldınov ınternettegi alaıaqtyqqa da toqtaldy. Byltyr qylmystyń bul túrinen 537 mln teńge shyǵyn kelgen. Tirkeletin ár tórt derektiń bireýi ǵana ashylady.

«Munyń birqatar obektıvti sebepteri bar. Sondyqtan, polıtseıler kún saıyn jelide qarjylyq operatsııalardy oryndaý kezinde asyqpaý jáne jeke derekterin eshkimge bermeý týraly túsindirý jumystaryn turaqty túrde júrgizip jatyr», - deıdi oblystyń bas polıtseıi.

Tikeleı efır barysynda kórermenderden túrli salalarǵa qatysty birqatar suraq túsip, olarǵa jaýap ta berildi.

Jalpy, polıtsııa departamentiniń bastyǵy apta saıyn azamattardy jeke suraqtarymen qabyldaıdy. Jeke qabyldaýǵa 8 [phone] telefony boıynsha aldyn ala qońyraý shalyp, jazylýǵa bolady.