SQO-da 3 mlrd 300 mln teńgeniń ekologııalyq ilki jobasy júzege asyrylýda
PETROPAVL. QazAqparat – Soltústik Qazaqstan oblysynda elimizdegi alǵashqy kárizdik tazartý stansasy salynyp jatyr. Іlki jobanyń qorytyndysy negizinde keıin basqa qalalarda da qurylys qolǵa alynbaq, dep habarlaıdy QazAqparat tilshisi.
SQO Ekologııa departamentiniń málimetinshe, óńirdiń ekologııalyq problemalaryn keshendi sheshý jónindegi 2020-2025 jyldarǵa arnalǵan Jol kartasy júzege asyrylyp jatyr. Jol kartasyna sáıkes ekologııalyq jaǵdaıdy kezeń-kezeńmen jaqsartý jeti baǵyt boıynsha josparlanǵan. Solardyń biri - sý resýrstaryn retteý, onyń aıasynda Ǵ.Músirepov atyndaǵy aýdan ortalyǵynda káriz jelileri men tazartý qurylystaryn salý kózdelgen.
2018 jyly bastalǵan qurylys Qazaqstan úshin pılottyq joba bolyp otyr, onyń qorytyndysy boıynsha aldaǵy ýaqytta basqa qalalar úshin baǵdarlama ázirlenbek.
Aýdandyq sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń aqparaty boıynsha, qurylystyń jalpy quny 3 mlrd 300 mln teńge, táýligine 3 myń tekshe metr sýdy tazalaıtyn qýaty bar.
«Joba aıasynda 26 km magıstraldyq jeli salyndy, aýdan ortalyǵynda 3 káriz-sorǵy stansasy boldy, taǵy 4 stansa jańadan salyndy, olardyń barlyǵy jańa jelige qosylatyn bolady. Tazartýdyń tórt satysynan ótkennen keıin sý Esil ózenine quıylady», - deıdi bólim basshysy Aıdyn Qazjanov.
Qurylysty júrgizip jatqan merdiger kompanııanyń bas ınjeneri Rýslan Dashkınniń aıtýynsha, káriz-sorǵy stansalary salyndy, jeliler 95 %-ǵa daıyn.
«Qazaqstanda osyndaı jabyq tıptegi kárizdik tazartý stansasy ázirge jalǵyz. Munda mehanıkalyq tazartý, sodan keıin bıologııalyq tazartý, sodan keıin úshinshi tazartý jáne zararsyzdandyrý júrgiziledi. Káriz-sorǵy stansalarynan kelip quıylatyn aǵyndylar qatty tazalaý ǵımaratynda iri qoqys pen qumnan aryltý úshin biriktirilgen eki sektsııaly qondyrǵylar arqyly ótedi. Nátıjesinde qoqystar ustalyp, arnaıy konteınerlerge túsedi. Ári qaraı aǵyndy baraban túrindegi mehanıkalyq torǵa túsedi. Baraban torynan túsirilgen qaldyqtar konteınerge jınalady. Sorǵy arqyly aǵyn sý kárizdik tazartý stansasyna jiberiledi. Ol jerde sý bıologııalyq tazartýdyń birneshe satysynan ótip, súzilip, ýltrakúlgin arqyly zararsyzdandyrylady», - deıdi Rýslan Dashkın.
Jabyq bolǵandyqtan júıe qysta da toqtaýsyz jumys istemek.
«Jabyq tıptegi tazartý qondyrǵylarynda birqatar artyqshylyqtar bar: túrli bakterııalar tazartýdy júzege asyrady, olardyń árqaısysy sýdaǵy belgili bir qospalarmen qorektenedi, osylaısha tazartady. Bul jerde qatty shý, ıis joq. Tazalaýdyń tórt satysynan ótken sý Esil ózenine quıylady. Onyń sapasy ózen sýynan jaqsy bolmaq», - deıdi «Qazaqstan temirjol kóligi ǵylymı-zertteý ınstıtýty» JShS avtorlyq qadaǵalaý ókili Aleksandr Vysokov.
