SQO-da 3 kúnnen beri 20 eldi meken turǵyndary jaryqsyz otyr
Soltústik Qazaqstan oblysynda borannyń saldarynan elektr qýatynan ajyrap qalǵan eldi mekenderge tek erteńderi ǵana jaryq berilýi múmkin, dep habarlaıdy Kazinform.
SQO energetıka jáne turǵyn úı-kommýnaldyq sharýashylyq basqarmasynyń bólim basshysy Erlan Qaıyrbekovtyń aıtýynsha, 26 jeltoqsan kúngi boranda barlyq 13 aýdannyń 181 eldi mekeni jaryqsyz qalǵan bolatyn.
Qazirgi ýaqytta 8 aýdannyń 20 eldi mekeni elektr qýatynan ajyraǵan. Olar: Esil, Mamlıýt, Ǵ.Músirepov atyndaǵy aýdan, Qyzyljar, Aıyrtaý, Shal aqyn jáne Tımırıazev aýdandary. Bul – 1 053 abonent.
«Úzilgen jerlerdi tez anyqtap, qalpyna keltirý múmkin bolmady. Oǵan birinshiden aýa raıy áser etti jáne jumys kólemi aýqymdy. Búgin-erteń barlyǵyn qosýdy josparlap otyrmyz. Qazirgi ýaqytta 92 apattyq-jóndeý brıgadalary jumys istep jatyr. 195 tehnıka jumyldyrylǵan. Jalpy bizde kezekshi apattyq-jóndeý brıgadalary bar. Olar mereke kúnderi de kezekshilik atqarady», - deıdi Erlan Qaıyrbekov.
SQO boıynsha búginde elektr jelileriniń 87%-y tozǵan. Sonyń saldarynan qolaısyz aýa raıynda elektr symdary úzilip, zardabyn turǵyndar tartyp jatyr.
Esterińizge salaıyq, 18 qarasha kúni de óńirde jaýyn men daýyldyń saldarynan 11 aýdanda 217 eldi meken jaryqsyz qalyp, keıbir aýyldar elektr qýatyna tek bir aptadan keıin ǵana qosyldy.
