SQO-da 3 kún ishinde 10-nan astam qarý tárkilendi
SQO polıtsııa departamenti baspasóz qyzmetiniń málimetinshe, «Quqyqtyq tártip» respýblıkalyq jedel-profılaktıkalyq is-sharasynyń maqsaty - qoǵamdyq oryndarda quqyqtyq tártipti saqtaý, eseptegi tulǵalardy qadaǵalaý, Jol júrisi qaǵıdalarynyń saqtalýyn baqylaýǵa alý. Úsh kúnge shaqtalǵan operatsııa barysynda tirkelmegen qarý-jaraqty anyqtaý mindeti de qoıyldy.
Qyzyljar aýdanyndaǵy bir aýyldyń ýchaskelik polıtsııa ınspektory bir kúnniń ishinde eki «IJ» myltyǵyn tárkiledi. Eki jaǵdaıda da myltyqtar úı kireberisinde saqtalyp kelgen, al bireýiniń úıinde kámeletke tolmaǵan balalary bolǵan. Osyǵan oraı QR Ákimshilik quqyq buzýshylyq týraly kodeksiniń 482-baby boıynsha materıaldar jınastyryldy. Alynǵan myltyqtar saraptamaǵa jiberildi.
«Jalpy jedel-profılaktıkalyq is-sharanyń 3 kúninde 1 travmatıkalyq tapansha men tirkelmegen 10 tegis uńǵyly myltyq tárkilendi. Qarýdy óz erkimen tapsyrý ǵana jaýapkershilikten bosatatynyn eske salamyz. Jedel-profılaktıkalyq is-sharany ótkizý kezinde 1477 túrli ákimshilik quqyq buzýshylyq anyqtaldy. Onyń ishindegi 300-ge jýyǵy - qoǵamdyq orynda ishimdikti ishý nemese mas kúıde júrý faktileri. Turmys salasynda 93 quqyqqa qaıshy derek tirkeldi. Kámeletke tolmaǵandardyń qaýipsizdigine erekshe nazar bólindi. Jasóspirimder túngi ýaqytta úıden tys nemese oıyn-saýyq oryndarynda júrgen 70 fakti anyqtaldy. Oblys joldarynda 17 mas júrgizýshi ustaldy», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.