SQO-da 3,5 myń turaqty donor bar
PETROPAVL. QazAqparat - Soltústik Qazaqstan oblysynda 3,5 myń turaqty donor tirkelgen. Qan ortalyǵy kez kelgen ýaqytta aýyr naýqasqa qajetti qandy taýyp bere alady, dep habarlaıdy QazAqparat tilshisi.
14 maýsym - halyqaralyq donor kúni. Bul mereke 2005 jyldan bastap álemniń 200 memleketinde toılanady. Bul kúnniń tańdap alynýy beker emes. aýstrııalyq dáriger Karl Landshteıner adam qanynyń toptarǵa bólinetindigi jóninde jańalyq ashyp, 1930 jyly sol úshin Nobel syılyǵyn aldy.
«Áleýmettik medıtsınalyq saqtandyrý qorynyń» SQO-daǵy fılıaly baspasóz qyzmetiniń málimetinshe, óńirde qan donorlyǵy máselesimen Oblystyq qan ortalyǵy aınalysady. ÁMSQ men qan ortalyǵy bıyl 594 mln teńgege kelisimshartqa jasasty. Qazirgi tańda oblystyń qan bankinde 68 lıtr qan saqtaýly, bul - 227 doza. Qor únemi tolyqtyrylyp otyrady, materıaldyń sırek túrleriniń jetkilikti bolýy baqylanady. Osyndaı sharalardyń arqasynda ortalyq kez kelgen ýaqytta aýyr naýqasqa qajetti qandy taýyp beredi.
Statıstıkalyq málimetterge súıensek, ár úshinshi syrqatqa ómirinde bir ret bolsyn donordyń qany quıylǵan. Qan tapsyrǵan adamnyń densaýlyǵyna zııan kelmeıdi, kerisinshe, aǵzasyna tıer paıdasy kóp. Mamandardyń aıtýynsha, turaqty túrde qan tapsyrý júrek-qan tamyrlary aýrýlarynyń aldyn alady, ımmýndyq júıe, baýyr men asqorytý júıesiniń jumysyn jaqsartyp, aǵzany jasartady eken.
«Qan tapsyrý donor úshin qaýipsiz. Onyń ústine donorlar tegin medıtsınalyq kómektiń kepildik berilgen kólemi sheńberinde AITV-ǵa, V jáne S gepatıtine, merezge analızder tapsyrýǵa, sondaı-aq óz qan tobyn, rezýs-faktordy, gemoglobın deńgeıin bilýge quqyly. Munyń barlyǵy da tegin jasalady», - deıdi «ÁMSQ» SQOF mamany Anna Penkova.
Mamandardyń aıtýynsha, erler jylyna 5-6 ret, al áıelder 3-4 qan tapsyra alady. Donorlyq - medıtsınalyq kómek sheńberinen áldeqashan shyǵyp ketti jáne áleýmettik aktsııa sıpatyna ıe.
