SQO-da 3,5 aıdyń ishinde muǵalim mamandyǵyn alyp shyǵýǵa bolady
PETROPAVL. QazAqparat – Soltústik Qazaqstan oblysynda joǵary bilimi barlarǵa endi 3,5 aıdyń ishinde daıarlyq kýrsynan ótip, mektepke muǵalim bolyp ornalasýlaryna múmkindik bar, dep habarlaıdy QazAqparat tilshisi.
Daıarlyq kýrstary byltyr qyrkúıek aıynda M. Qozybaev atyndaǵy Soltústik Qazaqstan memlekettik ýnıversıteti janyndaǵy qaıta daıarlaý jáne biliktilikti arttyrý ınstıtýtynda ashyldy. Bul el boıynsha qolǵa alynǵan alǵashqy pılottyq joba. Qyrkúıekten jeltoqsan aıyna deıin 40 adam oqyp shyqty.
«Bul mektepte jumys isteıtin muǵalimderge biliktilikterin arttyrýǵa nemese qosymsha mamandyq alǵysy keletinderge óte yńǵaıly. Arnaıy ýaqyt bólip oqýǵa da, qashyqtyqtan da bilim alýǵa bolady. Eldegi ustazdar jetispeýshiligin joıý maqsatynda zańdy túrde qolǵa alynǵan is-shara. Lıtsenzııa bar, bilim berý baǵdarlamalary akkredıttelgen», - deıdi qaıta daıarlaý jáne biliktilikti arttyrý ınstıtýtynyń dırektory ıÝldýz Almahodjaeva.
Kýrsqa kelýshi 3,5 aıdyń ishinde 1200 saǵat oqıtyn bolady. Oqý aqyly. Bitirgenderge eki sertıfıkat beriledi. Bireýi - kýrstan ótkendigin rastaıtyn kýálik bolsa, ekinshisi 5 jylǵa biliktilikti arttyrǵany úshin beriletin sertıfıkat.
«Birinshi lekpen bitirgen 40 adamnyń barlyǵy – muǵalimder. Olar «pedagogıkalyq ǵylymdar» baǵyty boıynsha óz biliktilikterin arttyrdy. Keıbiri keıin mektep dırektorlyǵyna jumysqa ornalasty. Qazir óńirde 474 mektep bolsa, onyń qyryǵynda mektep dırektorynyń orny bos tur. Jalpy oblysta pedagog kadrlarǵa qajettilik joq, bilim ordalary tolyq qamtylǵan», - deıdi SQO Bilim basqarmasynyń baspasóz hatshysy Jansaıa Qaıypova.
Mamandardyń aıtýynsha, kýrs jarty jylda bir ret uıymdastyrylady. Qazir kelesi kezeńge qabyldaý júrip jatyr, ol 28 aqpan kúni aıaqtalmaq. Búginde 60 adam ótinish bergen.
