SQO-da 28 jyl halyqaralyq izdeýde bolǵan tájikstandyq ustaldy
PETROPAVL. QazAqparat – Soltústik Qazaqstan oblysynda tártip saqshylary qaraqshylyq úshin 1992 jyldan beri halyqaralyq izdeýde júrgen shetel azamatyn ustady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, tártip saqshylary qysta turaqty mekenjaıy joq tulǵalardy taýyp, anyqtaýǵa basymdyq beredi. Olardy kúnniń sýyǵynda úsip ketýden aman alyp qalý úshin qabyldap-taratý mekemesiniń mamandary kúndelikti reıd júrgizip, qańǵybastar jıi shoǵyrlanatyn jylý trassalaryn, jertóleler men shatyrlardy, káriz qudyqtary men eski ǵımarattardy aralaıdy.
«Turǵylyqty mekenjaıy joq adamdardyń basym bóligi maskúnemdikke salynǵandar. Bizdiń mindetimiz olardyń kún sýyqta úsip ketýine jol bermeý. Bul sanattaǵy adamdar úshin oblys ortalyǵynda áleýmettik beıimdeý ortalyǵy jumys isteıdi», - deıdi Petropavl qalalyq polıtsııa basqarmasy qabyldap-taratý orny bastyǵynyń mindetin atqarýshy Pavel ıÝşenko.
Osyndaı reıdterdiń birinde buǵan deıin «qaraqshylyq shabýyl jasaýy múmkin» degen kúdikpen 1992 jyldan beri halyqaralyq izdeýde júrgen Tájikstan azamaty qolǵa tústi.
Jyl basynan polıtseıler úısiz-kúısiz júrgen 480 adamdy anyqtap, qabyldap-taratý ornyna jetkizgen. Olardyń qujattary tekseriledi, bolmaǵan jaǵdaıda málimetteri «Obraz++» atty avtomattandyrylǵan bazaǵa engiziledi. Byltyr osyndaı jumystardyń nátıjesinde izdeýde júrgen 10 qylmysker qolǵa tústi.
