SQO-da 28 gektar aýmaqta jańa orman tálimbaǵy qurylmaq
SQO tabıǵı resýrstar jáne tabıǵat paıdalanýdy retteý basqarmasy óńirlik kommýnıkatsııalar qyzmetinde ótken jyldy qorytyndylap, osy jyldyń josparymen bólisti.
Vedomstvo basshysy Beıbit Ismanovtyń aıtýynsha, Memleket basshysynyń tapsyrmasy boıynsha qazirgi ýaqytta ormandy alqaptardyń aýmaǵyn arttyrý mindeti tur. 2021-2025 jyldar aralyǵynda 20 myń ga alqapqa 100 mln kóshet otyrǵyzylýy tıis.
«Eki jylda orman mekemeleri qajetti kóshet alý úshin orman tálimbaqtarynyń aýmaǵyn keńeıtti. Tuqym jınap, tal egetin oryndardy anyqtady, materıaldyq-tehnıkalyq bazany nyǵaıtty.
2021 jyly 3,56 mln dana kóshet 869 ga aýmaqqa otyrǵyzyldy. Byltyr egiletin aýmaq eki esege artyp, 6,9 mln kóshet ornalastyryldy. Bıyl atqarylatyn jumys úsh ese artpaq. 4100 ga aýmaqqa 23,1 mln kóshet otyrǵyzý mindeti tur», - deıdi Beıbit Ismanov.
Otyrǵyzatyn qajetti materıalmen óńirdi qamtý úshin Esil aýdany ıAvlenka eldi mekeniniń mańynan orman tálimbaǵy qurylmaq. Bul maqsatqa 28 ga jer bólinbekshi. Al qajetti tehnıka, qondyrǵymen, elektr qýatymen qamtý úshin jáne jumysshylardy alýǵa 284 mln teńge qarjy kerek.
«Elimizde 2 mlrd aǵashtyń otyrǵyzylýyn baqylaý maqsatynda tsıfrlyq monıtorıng júrgiziledi. Ol úshin respýblıkalyq ınteraktıvti karta jasalǵan. Ol «Qazaqstan Ǵarysh Sapary» UK» AQ geoaqparattyq júıesine negizdeldi», - deıdi Beıbit Ismanov.