SQO-da 27 jańa jyldamdyq ólshegish keshen iske qosyldy
PETROPAVL. KAZINFORM — Soltústik Qazaqstan oblysynda jol-kólik oqıǵalarynyń aldyn alý úshin «aqyldy beınekameralar» kóptep ornatylyp jatyr.
SQO Polıtsııa departamenti baspasóz qyzmetiniń málimetinshe, jyldamdyqty asyrý faktilerin avtomatty túrde tirkeıtin apparattyq-baǵdarlamalyq keshender aýdan ortalyqtaryna qoıyldy.
— Polıtsııa jergilikti atqarýshy organdarmen birlesip, ár aýdan ortalyǵyndaǵy joldar men avtojoldardyń problemaly ýchaskelerin anyqtady. Jol-kólik oqıǵalarynyń statıstıkasy, kólik qozǵalysynyń qarqyndylyǵy, sondaı-aq jaqyn mańdaǵy mektepter men aýrýhanalardyń ornalasýy eskerildi. Negizgi maqsat — qaýipsizdikti arttyrý, — deıdi tártip saqshylary.
Qazirgi ýaqytta 11 aýdanda 27 jańa apparattyq-baǵdarlamalyq keshen paıdalanýǵa berildi. Polıtseılerdiń aıtýynsha, jyldamdyqty shamadan tys asyrý eń jıi kezdesetin zań buzýdyń biri. Ruqsat etilgen jyldamdyqtyń qanshalyqty asyrylǵanyna qaraı aıyppul 5-ten 40 aılyq eseptik kórsetkishke deıin (21 625 — 173 000 teńge aralyǵynda), al bir jyl ishinde qaıtalanǵan jaǵdaıda 30-dan 60 AEK-ke (129 750 teńgeden 259 500 teńgege) deıin bolýy múmkin.
Búginde SQO-da barlyǵy 121 apparattyq-baǵdarlamalyq keshen jumys isteıdi. Olardyń kómegimen Jol qozǵalysy erejelerin buzýdyń 134 myńnan astam deregi anyqtaldy.
Al Tsıfrlandyrý jáne jasandy ıntellekt jyly aıasynda SQO-nyń barlyq aýdandyq polıtsııa bólimderinde jedel basqarý ortalyqtary ashylyp jatyr.
Buǵan deıin SQO mektepterinde býllıngtiń aldyn alýǵa baǵyttalǵan beınekameralardyń sany artqanyn jazǵan edik.
