SQO-da 27 myńǵa jýyq adam tumaýǵa qarsy vaktsına aldy
PETROPAVL. KAZINFORM – Soltústik Qazaqstan oblysynda jańa epıdemııalyq maýsym bastalǵaly beri jiti respıratorlyq vırýstyq ınfektsııany 10 myńǵa jýyq adam juqtyrdy.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, ázirge tumaý juqtyrǵandar joq. Іndettiń aldyn alý maqsatynda óńirde tumaýǵa qarsy vaktsınatsııa júrip jatyr. Osy maqsatta reseılik «Grıppol Plıýs» vaktsınasynyń 60 myń dozasy satyp alynǵan.
Búginge deıin tumaýǵa qarsy ekpe alǵandar sany 26 935 adamǵa jetti. Vaktsınatsııa tirkelgen jeri boıynsha emhanalarda tegin júrgiziledi.
Ekpe aldymen medıtsına qyzmetkerlerine, medıtsınalyq uıymdarda dıspanserlik esepte turǵan balalarǵa, balalar úıleri men qarttar úıleriniń tárbıelenýshileri men turǵyndaryna usynylady. Sondaı-aq sozylmaly aýrýlary bar azamattar, júkti áıelder, egde jastaǵy adamdar, mektep oqýshylary jáne basqa da epıdemıologııalyq kórsetilimder boıynsha vaktsınatsııalaýǵa jatatyn adamdar qamtylady.
- Dene qyzýynyń kóterilýi, álsizdik, tamaqtyń aýyrýy jáne murynnyń bitelýi sııaqty aýrý belgileri paıda bolǵan jaǵdaıda dárigerge kóriný nemese úıge medıtsına qyzmetkerin shaqyrý qajet. Aýrýdyń uzaqqa sozylýy asqynýlarǵa ákelýi múmkin. Eń qaýiptisi – pnevmonııa, - deıdi mamandar.
JRVI men tumaýdan saqtaný úshin qarapaıym talaptardy saqtaǵan jón. Dárigerler bólmeni únemi jeldetip, qoldy muqııat jýýǵa, durys tamaqtanýǵa jáne uıqy rejımin saqtaýǵa keńes beredi. Sondaı-aq adam kóp jınalatyn oryndarǵa barýdy shektep, qajet bolǵan jaǵdaıda betperde taqqan durys.
Buǵan deıin Túrkistan oblysynda 8 myńǵa jýyq adam JRVI juqtyrǵanyn jazǵan edik.
