SQO-da 264 aýylǵa joǵary jyldamdyqty ınternet tartylyp jatyr
PETROPAVL. KAZINFORM – Soltústik Qazaqstan oblysynda «Qoljetimdi ınternet» ulttyq jobasy aıasynda qolǵa alynǵan jumys eki jylǵa shaqtalǵan.
SQO ákimdiginiń tsıfrlyq tehnologııalar basqarmasynyń málimetinshe, qazirgi ýaqytta alty aýdanda 823 shaqyrym baılanys jelisi tartylǵan. Bul bıylǵa josparlanǵan jumystyń 55%.
Talshyqty-optıkalyq baılanys jelisi shalǵaı eldi meken turǵyndarynyń joǵary jyldamdyqty ınternetke qol jetkizbek. Nátıjesinde aýyl turǵyndary memlekettik qyzmetterdi onlaın alýǵa, qashyqtan bilim alýǵa, tsıfrlyq tehnologııalardy paıdalanýǵa múmkindik alady.
Jalpy, mamandardyń aıtýynsha, aldaǵy 2–3 jylda óńirde tsıfrlandyrý qarqyny kúsheıedi. Sonyń biri - memlekettik organdardyń aqparattyq júıelerin QazTech biryńǵaı memlekettik tehnologııalyq platformasyna kóshirý jumysy.
QazTech - memlekettik organdardyń aqparattyq júıelerin biryńǵaı tehnologııalyq standarttar negizinde ázirleýge, ornalastyrýǵa, ózara yqpaldastyrýǵa jáne paıdalanýǵa arnalǵan platforma. Ol memlekettik aqparattyq júıelerdiń jumysyn úılestirýge, aqparattyq qaýipsizdik talaptaryn saqtaýǵa jáne tsıfrlyq qyzmetterdiń sapasyn arttyrýǵa baǵyttalǵan.
Sonymen qatar aýdandardaǵy IT-ınfraqurylymdy damytý, halyqtyń tsıfrlyq saýattylyǵyn arttyrý jáne eńbek naryǵynda suranysqa ıe IT-mamandardy daıarlaý kózdelip otyr.
Densaýlyq saqtaý, bilim berý jáne basqa da salalardy, sondaı-aq aýyldyq eldi mekenderdi tsıfrlandyrý jumystary da jalǵasyn tabady.
Máselen, 109 - biryńǵaı baılanys ortalyǵy qyzmetin oblys turǵyndaryna qoljetimdi etý josparlanyp otyr. Bul bastama iske asqan jaǵdaıda, turǵyndardyń ótinishteri men máselelerin qabyldaý jáne tıisti qyzmettermen baılanystyrý múmkindikteri keńeımek.
Buǵan deıin tsıfrlandyrý esebinen bıýdjetke qosymsha 410 mlrd teńge túskenin jazǵan edik.
