SQO-da 26 mektep oqýshysy kásipkerliktiń qyr-syryn meńgerdi
PETROPAVL. QazAqparat - SQO-da «Jas kásipkerler klýbyna» qatysýshy 26 jasóspirim kásipkerliktiń negizderimen tanysyp, sertıfıkat aldy, dep habarlaıdy QazAqparat tilshisi.
«Atameken» Ulttyq kásipkerler palatasynyń óńirlik fılıalynda úshinshi jyl qatarynan «Jas kásipkerler klýby» jumys istep keledi. Bıznes-jattyqtyrýshylar bolashaqta óz kásibin ashamyn deıtin mektep oqýshylaryna osy salada baǵyt-baǵdar kórsetip, aqyl-keńes beredi. Bıznes-jattyqtyrýshy Elena Konıahınanyń aıtýynsha, oqytý baǵdarlamasy jasóspirimderdiń jas ereksheligine saı jasalǵan. Oıyn túrinde ótetin sabaqtarda oqýshylar túrli tapsyrmalar oryndap, bıznes-jospar quryp, ony qorǵaýǵa múmkindik alady. 3 jyl ishinde kýrstan 50-ge jaqyn jasóspirim ótken.
Balalar 4 toqsan boıy aı saıyn bıznes-jattyqtyrýshylarmen kezdesip, sheberlik saǵattaryna qatysty. Qajetti bilim alǵan klýb músheleri búgin ony is júzinde qoldanyp kórmek. ıAǵnı tapsyrma boıynsha eki bıznes-jospar ázirleýleri kerek.
Petropavldaǵy 26-mekteptiń oqýshysy Gleb Fomın bolashaqta óz kásibin ashqysy keledi. Úlgi tutar jan da bar. Byltyr osy mekteptiń túlegi Janat Kákimov kásipkerlik kýrstarynan ótti. Búginde jas kásipker óz bıznes-ıdeıasyn júzege asyryp jatyr.
«Bul jerde bıznestiń qalaı jumys isteıtinin túsinikti etip aıtady. Jospar qurýǵa, ony júzege asyrýǵa kómektesedi. Qazir qandaı memlekettik baǵdarlamalardyń bar ekenin, qaısysynyń kómegine júginýge bolatynyn bildik. Bul - jas kásipkerlerge óte úlken kómek. Bizge endi tek naqty nemen aınalysatynymyzdy ǵana anyqtaý qaldy», - deıdi Gleb Fomın.
Ulttyq kásipkerler palatasy baspasóz qyzmetiniń málimetinshe, M.Qozybaev atyndaǵy SQMÝ-i jáne kolledj stýdentteri de dál osylaısha kásipkerliktiń negizderimen tanysady. Oqý oryndarynda jyl saıyn 2,5 myńnan astam jas kýrstan ótedi eken. Al jańa oqý jylynan bastap mektepterde joǵary synyp oqýshylaryna kásipkerlik negizderi fakýltatıvti pán retinde engizilmekshi.
