SQO-da 26 qańtar kúni bastaýysh synyptarǵa sabaq bolmaıdy
PETROPAVL. QazAqparat - Soltústik Qazaqstan oblysynda 26 qańtar kúni 0-4 synyptarǵa sabaq bolmaıdy, dep habarlaıdy «QazAqparat» HAA.
Soltústik Qazaqstan oqýshylary 22 qańtardan beri mektepke bara almaı otyr. Dúısenbide kúsheıgen sary aıaz áli báseńsir emes. Termometr baǵany kúndiz mınýs 30-35, túnde mınýs 39 gradýsqa deıin tómendeýde.
«112» qyzmeti 26 qańtar kúni aýa temperatýrasynyń mınýs 30 gradýsqa deıin tómendeýine baılanysty eskertý jarııalap, bastaýysh synyptarǵa sabaq bolmaıtynyn málimdedi.
SQO TJD baspasóz qyzmetindegiler búgin 20:00-den erteń 13:00-ge deıin dızelmen júretin kólikter úshin joldar jabyq ekenin habarlady.
Aýa raıy boljamyna sáıkes, demalys kúnderi aıaz biraz sheginedi. Óńirdegi aýa temperatýrasy 15-20 gradýsqa deıin kóteriledi.
